अखबार नेपाल ट्रेन्डिङ

काठमाडौं: नेपाली चलचित्रका महानायक राजेश हमालको जीवन, सिनेमा यात्रा र समाजप्रतिको योगदान समेटिएको ‘युगदेखि युगसम्म’ पुस्तक सार्वजनिक भएको छ । शनिबार काठमाडौंस्थित नेपाल प्रज्ञा प्रतिष्ठान भवनको डवलीमा आयोजित एक कार्यक्रममा यो पुस्तक लोकार्पण गरिएको हो ।

लोकार्पण कार्यक्रममा स्वयं महानायक राजेश हमाल, लेखक यज्ञश, चर्चित लेखक बुद्धिसागर र मधु भट्टराईले संयुक्त रूपमा पुस्तक सार्वजनिक गरे । ‘युगदेखि युगसम्म’ मा राजेश हमालको पर्दादेखि पानासम्मको लामो यात्रा, चलचित्र क्षेत्रमा बिताएको समय, सङ्घर्ष, सफलताका कथाहरू र व्यक्तिगत जीवनका सम्झनाहरू समेटिएका छन् । पुस्तकले हमालको जीवनका स्मृति र संस्कारहरूलाई आत्मीय ढङ्गले प्रस्तुत गरेको छ ।

कार्यक्रममा उपस्थित चलचित्रप्रेमी र पाठकहरूको उत्साह उल्लेखनीय थियो । पुस्तकमा हमालको चलचित्रमा योगदान मात्र नभई उनको विचार, समाजप्रतिको दृष्टिकोण र नेपाली सिनेमा विकासमा दिएको भूमिका पनि समेटिएको छ । महानायक राजेश हमालको ‘युगदेखि युगसम्म’ चलचित्रप्रेमी, साहित्यप्रेमी र हमालका प्रशंसकहरूका लागि पढ्नैपर्ने कृति बनेको उपस्थित सबैले बताएका थिए ।