अखबार नेपाल ट्रेन्डिङ

काठमाडौं: भुटानमा जारी एसीसी महिला यू-२० एसियन कप छनोटमा नेपालले आज बलियो टोली उत्तर कोरियासँग खेल्दैछ । खेल थिम्पुस्थिति चाम्लिङ्थाम रंगशालामा दिउँसो पौने २ बजे सुरु हुनेछ । उत्तर कोरिया यू-२० एसियन कपको च्याम्पियन पनि हो ।

आजको खेलमा नेपालले जितको लक्ष्य लिएको छ । महिला टोलीका मुख्य प्रशिक्षक यामप्रसाद गुरुङले अन्तिम खेललाई ध्यानमा राखेर साउदी अरेबियाविरुद्धको शुक्रबारको खेलमा पाँच परिवर्तन गरेको बताएका छन् । शुक्रबारको खेलमा उनले पाँच खेलाडीलाई सुरुआति ११ मा अवसर दिए पनि दोस्रो हाफमा उनीहरूलाई प्रतिस्थापन गरेका थिए ।​ साउदी अरबविरुद्ध नेपालले एक शून्यको साँघुरो जित निकालेको थियो ।

एसियन कपमा छनोट हुने सम्भावना बाँकी रहेको कारण नेपालले उत्तर कोरियासँग उत्कृष्ट प्रदर्शनसहित नतिजा आफ्नो अनुकुलमा आउनु पर्नेछ ।  नेपाल समूह विजेता अथवा उत्कृष्ट दोस्रो टिम बन्न सफल भए एसियन कपमा छनोट हुनेछ । नेपालले दुई खेलबाट ४ अंक बनाएको छ । पहिलो खेलमा नेपाल भुटानसँग १-१ गोलको बराबरीमा रोकिएको थियो । उत्तर कोरियाले भने साउदी अरबलाई १५-० र भुटानलाई १०-० गोलले हराएको थियो ।

समूह ‘ए’ मा रहेका भुटान र साउदी अरबको खेल पनि आजै हुँदैछ । दुई खेल खेलेको भुटानको एक अंक रहेको छ भने साउदी अरब अंकविहीन छ ।