अखबार नेपाल ट्रेन्डिङ

काठमाडौं: महिला युरो कपको फाइनलमा स्पेन र इङ्गल्याण्डबीच उपाधि भिडन्त आज हुँदैछ । खेल नेपाली समय अनुसार राति पौने ९ बजे स्विटजरल्याण्डको सेन्ट ज्याकोब पार्क बासेल स्टेडियममा हुनेछ ।

यी दुई टोलीले दुई वर्षको अवधिमा दोस्रोपटक महत्वपूर्ण प्रतियोगिताको फाइनलमा भिड्न लागेका हुन् ।  इङ्गल्याण्ड युरोको साबिक विजेता हो भने स्पेन विश्व च्याम्पियन । दुई वर्षअगाडि मात्रै यिनै दुई टिम विश्वकपको फाइनल खेलेका थिए । त्यसमा स्पेन १-० ले विजयी भएको थियो । यो खेल इङ्गल्याण्डका लागि उपाधि रक्षाको मात्र हैन स्पनेसँग २ वर्ष पहिला विश्व विजेताबाट बञ्चित हुँदाको बदला लिने असवर पनि हो । त्यसैले इङ्गल्याण्ड स्पेनमाथि बदला लिने दाउमा हुनेछ ।

फाईनल प्रवेशका लागि इङ्गल्याण्डले इटालीलाई २-१ गोल अन्तरले पराजित गरेको थियो भने स्पेनले जर्मनीलाई १-० गोल अन्तरले पराजित गरेको थियो । पछिल्लो दुई वर्षमा स्पेनको महिला फुटबलले कमाल नै गरेको छ । स्पेन नै अबको युरो उपाधिका लागि बलियो दाबेदार देखिएको छ । किनभने यो टिमले विश्वकप मात्र होइन, नेसन्स लिग पनि जितेको छ ।

पछिल्लो विश्वकपयता यी दुई टिमबीच दुई पटक भेट भएको छ । जसमध्ये एक खेलमा इङ्गल्याण्ड १-० ले विजयी रहेको छ भने अर्कोमा स्पेन २-१ ले विजयी भएको छ । युरोकपमा भने यी दुई टोलीको चौथो भेट हो । अघिल्लो युरोकपमा इङ्ल्यान्डले स्पेनलाई २-१ गोलले हराएर अन्तिम ८ बाट घर पठाएको थियो । त्यसअघि २०१७ को समूह चरणमामा स्पेन २-० ले पराजित हुन पुग्यो । सन् २०१३ मा भने स्पेनले ३-२ गोलले इङ्ल्यान्डलाई पन्छाएको थियो ।