अखबार नेपाल ट्रेन्डिङ

काठमाडौं: नेपालले थाइल्यान्डको राजधानी बैंककमा घरेलु टोलीसँग (आज) मे ३० मा पहिलो र जुन २ मा दोस्रो खेल खेल्दैछ । यी दुईबीचको अन्तिम खेलले मात्र अन्तर्राष्ट्रिय मान्यता पाउने छ । दुवै खेल नेपालले एएफसी महिला एसियन कप छनोट प्रतियोगिताको तयारी स्वरूप खेल्न लागेको हो ।

यी खेलका लागि सावित्रा भण्डारी ‘साम्बा’ र रेखा पौडेल सिधै थाइल्यान्डमा नेपाली राष्ट्रिय फुटबल टोलीसँग जोडिएका छन् । साम्बा २०८० माघमा फ्रान्सको शीर्ष डिभिजन लिग क्लब अभान्ट ग्वेन्ग्याम्पमा अनुबन्ध भएकी थिइन् । दुई सिजन खेल्दा उनको क्लब अघिल्लो संस्करण २२ खेलबाट १६ अंक जोड्दै १२ टिम सम्मिलित लिगमा १०औं स्थानमा रहेर रेलिगेसनबाट जोगिएको थियो ।

यसपल्ट भने ग्वेन्ग्याम्प ३ खेल अगावै रेलिगेसनमा परेको थियो । ग्वेन्ग्याम्प ९ अंकसहित पुछारमा रह्यो । साम्बाले यस सिजन एक ह्याट्रिकसहित ६ गोल गरेकी थिइन् । त्यसमा पेरिस सेन्ट–जर्मेन (पिएसजी) विरुद्ध दुई गोल पनि समावेश छ । तर, उनको उक्त गोलले क्लबलाई शीर्ष डिभिजनमा टिकाइराख्न सकेन ।

यता, स्टाइकर रेखा पौडेल पनि व्यावसायिक फुटबल खेल्न विदेशमा छिन् । रेखाले संयुक्त अरब इमिरेट्स (युएई)को अबुधाबी कन्ट्री क्लबबाट फुटबल खेल्दै आएकी छन् ।