अखबार नेपाल ट्रेन्डिङ

काठमाडौं: नेपाली राष्ट्रिय महिला फुटबल टोलीकी स्टार स्टाइकर सावित्रा भण्डारी ‘साम्बा’ आज नेपाल फर्किँदै छिन् । उनी एअर इन्डिया मार्फत स्वदेश फर्किने अखिल नेपाल फुटबल संघ (एन्फा)ले जनाएको छ । उनी सोमबार बिहान मात्रै नेपाल आइपुग्ने एन्फाले जनाएको छ ।

सोमबारदेखि नेपालले त्रिपुरेश्वरस्थित दशरथ रंगशालामा इन्टरनेसनल वुमेन्स च्याम्पियनसिप सुरुआत गर्दै छ । उद्घाटन खेलमा नेपालले किर्गिस्तानसँग खेल्नेछ । साम्बाको टोलीले अभान्ट ग्वेन्ग्याम्पको शनिबार फ्रान्सको शीर्ष श्रेणीको लिगमा खेल थियो । उनको टोली रेलिगेसन जोनमा रहेको हुँदा क्लबले ढिला गरेर फुकुवा गरेसँगै उनी स्वदेश फर्किन ढिला भएको हो ।

लामो यात्रा गर्नुपर्ने भएको कारण साम्बाले किर्गिस्तानसँगको पहिलो खेल गुमाउने सम्भावना प्रबल रहेको मुख्य प्रशिक्षक राजेन्द्र तामाङले बताए । ‘साम्बा अलिक ढिला गरेर आउने छ । त्यसैले उसले पहिलो खेल खेल्न सक्दैन होला,’ उनले भने । नेपाली राष्ट्रिय महिला टोलीको जर्सीबाट सर्वाधिक ५५ गोल गरिसकेकी साम्बा पछिल्लो समय फ्रान्समा व्यवसायिक फुटबल खेलिरहेकी छन् । तर, उनको टोलीले लिगमा राम्रो प्रदर्शन गर्न सकेको छैन ।