अखबार नेपाल ट्रेन्डिङ

काठमाडौं: व्यवसायीक फुटबल खेल्नका लागि युएई पुगेकी नेपाली राष्ट्रिय महिला फुटबल टोलीकी फरवार्ड रेखा पौडेल इन्टरनेसनल वुमेन्स च्याम्पियनसिप खेल्नका लागि शनिबार नेपाल आइपुग्ने भएकी छिन् । उनी हाल आवुधावी काउन्ट्री खेलिरहेकी छन् ।

नेपाललाई छैटौ पल्ट साफ च्याम्पियनसिपको फाइनलमा पुर्‍याउन उनले सात गोल गरेकी थिइन् । तर, सेमिफाइनलमा भारतविरुद्ध दोहोरो पहेंलोसहित रातो कार्ड बेहोर्दा उनले फाइनल भने गुमाएकी थिइन् । एएफसी एसियन कप र फिफा विश्वकपलाई लक्षित गरेर आयोजना गरिएको यो प्रतियोगिता त्रिपुरेश्वरस्थित दशरथ रंगशालामा हुनेछ ।

फिफा अन्तर्राष्ट्रिय विन्डोअन्तर्गत फागुन ५ देखि १४ सम्म सञ्चालन हुने प्रतियोगितामा घरेलु टोली नेपालसँगै कीर्गिस्तान, म्यानमार र लेबननको सहभागिता रहनेछ । नेपालले फागुन ५ मा किर्गिस्तानसँग खेल्दै प्रतियोगिताको सुरुआत गर्नेछ । यसैगरी नेपालले फागुन ८ मा लेबनान र ११ मा म्यानमारको सामना गर्नेछ ।