अखबार नेपाल ट्रेन्डिङ

काठमाडौं: नेपालले सन् २०२७ मा साउदी अरबमा हुने एएफसी एसियन कप तेस्रो चरणको छनोटमा भियतनाम र मलेसिया प्रतिद्वन्दी पाएको छ । मलेसियाको क्वालालम्पुरस्थित एएफसी हाउसमा सोमबार भएको ‘ड्र’ मा नेपालसँगै भियतनाम, मलेसिया र लाओस समूह ‘एफ’ मा परेका हुन् ।

२४ टिमलाई ४-४ समूहमा विभाजन गर्दै नेपाललाई पोट ३ मा राखिएको थियो । जसअनुसार नेपालले पोट १ बाट भियतनाम, पोट २ बाट मलेसिया र पोट ४ बाट लाओस प्रतिद्वन्दी पाएको हो । एएफसीका अनुसार २५ मार्चबाट सुरु हुने प्रतियोगिता राउन्ड रोबिन फर्म्याटमा होम एन्ड अवेमा हुनेछ । प्रत्येक समूहको विजेताले सन् २०२७ मा साउदीमा आयोजना हुने एएफसी एसियन कपका लागि छनोट हुनेछ ।

नेपालले मार्च २४ मा मलेसियासँगै खेल्दै प्रतियोगिताको सुरुवात गर्नेछ । फिफा वरीयतामा १३२औं स्थानमा रहेको मलेसियाले चारपल्ट एसिया कप खेलिसकेको छ । सन् १९७६,१९८०, २००७ र २०२३ मा खेलेको मलेसिया समूहचरणबाट अगाडि बढ्न सकेको छैन । यता, भियतनाम फिफा वरीयतामा ११६औं स्थानमा छ । यो टोलीले पाँचपल्ट एसियन कप खेलिसकेको छ । सन् १९५६ र १९६० मा यो टोली लगातार दुईपल्ट चौथो हुन सफल भएको थियो । सन् २००७ र १९ मा क्वार्टरफाइनलसम्म पुगेको यो टोली गत वर्ष भने समूहचरणबाट बाहिरिएको थियो ।