अखबार नेपाल ट्रेन्डिङ

काठमाडौं: जारी सेन्ट्रल एसियन भलिबल एसोसिएसन (काभा) पुरुष भलिबल क्लब च्याम्पियनसिप अन्तर्गत गण्डकी प्रदेशले आज तेस्रो खेल खेल्दैछ । त्रिपुरेश्वरस्थित राष्ट्रिय खेलकुद परिषद् (राखेप) को कभर्डहलमा खेल बेलुका ५ बजे हुनेछ । पहिलो खेल भने भारतको क्यालिकट हिरोज र माल्दिभ्सको क्लव एचडिसीबीच २:३० बजे खेल हुनेछ ।

पहिलो जितको खोजीमा रहेको गण्डकीले इरानको चादौर क्लबसँग खेल्नेछ । गण्डकीले पहिलो खेलमा माल्दिभ्सको एचडिसी क्लबसँग ३–२ को हार बेहोरेको थियो । आइतबार भएको दोस्रो खेलमा हेल्प नेपालले गण्डकीलाई ३–१ को सेटमा पाखा लगायो । इरानी टोलीले भने माल्दिभ्सको क्लब एचडिसीमाथि ३–२ को रोमाञ्चक जित निकाल्न सफल भएको थियो ।

सिंगल राउन्ड रोविनमा हुने लिग चरणमा १० खेलहरु हुनेछन् । त्यसपछि शीर्ष चार टोलीले सेमिफाइनल खेल्नेछ । लिग चरणमा पहिलो र तेस्रो हुनेबीच पहिलो सेमिफाइनलमा भिड्ने छन् । दोस्रो र चौथो हुने टोली दोस्रो सेमिफाइनलमा प्रतिस्पर्धा गर्दै फाइनलको दाबेदारी प्रस्तुत गर्नेछन् । फाइनल खेल मंसिर २९ गते हुनेछ ।