अखबार नेपाल ट्रेन्डिङ

काठमाडौं: नेपाली महिला राष्ट्रिय भलिबल टोलीले रसियनसँगको दुई मैत्रीपुर्ण खेलमा पराजित भएको छ । आज भएको दोस्रो खेलमा नेपाल ३-० को सोझो सेटमा पराजित भयो । हिजो भएको पहिलो खेलमा पनि नेपाल ३-० को सोझो सेटमा नै पराजित भएको थियो ।

त्रिपुरेश्वरस्थित राष्ट्रिय खेलकुद परिषदको कभर्डहलमा आज भएको खेलको पहिलो सेट २५-१४ ले गुमायो । दोस्रो सेटमा नेपालले पुनरागमनको प्रयास गरेपनि नतिजा २५-२३ ले सुम्पियो । तेस्रो सेटमा पनि नेपालले रसियालाई बलियो चुनौती पेश गरेपनि नतिजा आफ्नो पक्षमा पार्न सकेन । नेपाल तेस्रो सेटमा २५-२२ ले पराजित हुन पुग्यो ।

नेपालस्थित रसियाको दूतावासको विशेष सहयोगमा नेपाल भलिबल संघले मैत्रीपूर्ण खेल आयोजना गरेको हो । अब नेपाली टोली काभा नेसन्स लिगको लागि तयारीमा जुट्नेछ । काभा नेसन्स लिग साउन १७ गतेदेखि काठमाडौंमा सुरु हुदैछ । काभा नेसन्स लिगमा आयोजक नेपालसँगै भारत, इरान, श्रीलंका र माल्दिभ्सको सहभागिता रहनेछ ।

तस्बीरमा महिला भलिबल