अखबार नेपाल ट्रेन्डिङ

एजेन्सी: रोमानियालाई नेदरल्याण्ड्स र टर्कीले अष्ट्रियालाई हराउँदै युरोपेली च्याम्पियनसिप २०२४ को क्वाटरफाइनलमा प्रवेश गरेको छ । गएराती भएको पहिलो खेलमा नेदरल्याण्ड्सले रोमानियालई ३-० गोल अन्तरले पराजित गरेको हो ।

खेलको २०औं मिनेटमा कोडी गाक्पोले सुरुवाती गोल गर्दै नेदरल्याण्ड्सलाई अग्रता दिलाएका थिए । दोस्रो गोल ८३औं मिनेटमा डोन्यल मालेनले गरे । तेस्रो गोल मालेनले नै इन्ज्युरी समयको चौथो मिनेटमा गर्दै जित निश्चित गरे ।

त्यसैगरी गएराति नै भएको दोस्रो खेलमा अष्ट्रियालाई २-१ गोल अन्तरले हराउँदै टर्की क्वार्टरफाईनलमा प्रवेश गरेको छ । टर्कीको जितमा डिफेन्डर मरिह डेमीरालले दुवै गोल गरेका थिए । अष्ट्रियाले खेलको अन्त्यतिर लगातार आक्रमण बुन्दै गोल फर्काएपनि बराबरी भने गर्न सकेन ।

खेलको पहिलो मिनेटमै डेमीरालले टर्कीलाई अग्रता दिलाएका थिए । खेलको दोस्रो हाफको ६६औं मिनेटमा गुलरकै कर्नरमा उनले हेडरमार्फत गोल गर्दै अग्रता दोब्बर पारे । ६६औं मिनेटमा अष्ट्रियाले गोल फर्कायो । माइकल ग्रेगोरिस्चले क्लियर हुन नसकेको बलमा गोल गर्दै खेलमा फर्काए ।

अब टर्कीले क्वाटरफाइनलमा नेदरल्यान्ड्सको सामना गर्नेछ । अन्य क्वाटरफाइनलमा स्पेनले जर्मनी, इंग्ल्यान्डले स्विटजरल्यान्ड तथा फ्रान्सले पोर्चुगलको सामना गर्नेछ ।