अखबार नेपाल ट्रेन्डिङ

काठमाडौं: दक्षिण अफ्रिकालाई हराउँदै भारतले १७ वर्षपछि आइसिसी ट्वान्टी-२० विश्वकपको उपाधि जितेको छ । शनिबार राति सम्पन्न खेलमा दक्षिण अफ्रिकालाई ७ रनले पराजित गर्दै भारतले सन् २००७ पछि पहिलोपल्ट उपाधि जितेको हो ।

भारतले दिएको १७७ रनको लक्ष्य पछ्याएको दक्षिण अफ्रिकाले निर्धारित २० ओभरमा ८ विकेट गुमाउँदै १६९ रनमात्रै बनाउन सक्यो । दक्षिण अफ्रिकाका हाइनरिक क्लासनले सर्वाधिक ५२ रन बनाए । २७ बल खेलका उनले दुई चौका र पाँच छक्का प्रहार गरे । क्विन्टन डी कक ३९, ट्रिस्टन स्टब्स ३१ र डेभिड मिलर २१ रनमा आउट हुँदा अन्य खेलाडीले दोहोरो अंकमा रन बटुल्न सकेनन् । भारतका हार्दिक पाण्ड्याले सर्वाधिक तीन विकेट लिए । अर्शदीप सिंह र जसप्रीत बुहराहले समान दुई विकेट लिँदा अक्षर पटेलको नाममा एक विकेट रह्यो ।

त्यसअघि टस जितेर पहिला ब्याटिङ थालेको भारतले निर्धारित २० ओभरमा ७ विकेट गुमाउँदै १७६ रन बनाएको थियो । भारतका विराट कोहलीले सर्वाधिक ७६ रन बनाए । ५९ बल खेलेका उनले ६ चौका र दुई छक्का प्रहार गरे । अक्षर पटेल ४७ र शिवम् दुबे २७ रनमा आउट हुँदा हार्दिक पाण्ड्या ५ रनमा अविजित रहे । अन्यले भने राम्रो प्रदर्शन गर्न सकेनन् । केशव महराजा र एनरिर्च नोर्ट्जेले समान दुई विकेट लिए । मार्को जोन्सन र कागिसो रबाडाको नाममा एक/एक विकेट रह्यो ।