अखबार नेपाल ट्रेन्डिङ

काठमाडौं: आइसिसी टि-२० विश्वकप उपाधि जितेपछि भारतीय क्रिकेट टोलीका कप्तान रोहित शर्माले सन्न्यासको घोषणा गरका छन् । त्यसैगरी पूर्व कप्तान तथा भारतीय टोलीका ओपनर विराट कोहलीले पनि टि-२० बाट सन्न्यासको घोषणा गरेका छन् ।

भारतलाई १७ वर्षपछि आइसिसी ट्वान्टी-२० विश्वकप जिताएसँगै कोहलीले सन्न्यास लिएका हुन् । ‘यो सन्यास लिने सही समय हो । अब नयाँ पुस्ताले यो विरासतलाई अगाडि बढाउने समय आएको छ,’ उनले भने, ‘यो भारतका लागि मेरो अन्तिम ट्वान्टी-२० विश्वकप खेल थियो । हामी यसलाई हासिल गर्न चाहन्थ्यौं ।’ प्रतियोगिताभर नचलेका कोहलीले दक्षिण अफ्रिकाविरुद्धको फाइनलमा ५९ बलमा ६ चौका र दुई छक्का प्रहार गर्दै ७६ रन बनाउँदै ‘प्लेयर अफ द म्याच’ घोषित भए ।

यसैबीच फाइनल खेलपछिको पत्रकार सम्मेलनमा कप्तान रोहित शर्माले भने- ‘जति बेलादेखि मैले यो फर्मेट खेल्न थाले रमाइलो लाग्थ्यो । मैले हरेक क्षण आनन्द लिए । विदा लिने यो‌ समय हो ।’ आफूले चाहेको सफलता पाएको उल्लेख गर्दै भने, ‘म यो उपाधि जित्न चाहन्थे । सन्चारकर्मीलाई पनि धन्यवाद दिन चाहन्छु ।’ उनले उपाधि टोलीका प्रशिक्षक राहुल द्रविडलाई समर्पित गरेको बताए । ‘उहाँले पछिल्लो २०/२५ वर्ष भारतीय क्रिकेटका लागि योगदान गर्नुभएको थियो । यो पाटो छुटेको थियो । उनका लागि हामीले यो सफलता दिलाउन सकेकोमा पुरै टोलीकातर्फ खुसी व्यक्त गर्दछु ।’

शनिबार दक्षिण अफ्रिकालाई ७ रनले हराउँदै भारतले दोस्रो पटक टि-२० विश्वकप जितेको थियो । यसअघि भारत सन्‌ २००७ मा भएको पहिलो संस्करणमा च्याम्पियन बनेको थियो । रोहित त्यतिबेला पनि टोलीका सदस्य थिए ।