अखबार नेपाल ट्रेन्डिङ

काठमाडौं: ओमानमा जारी एसीसी पुरुष प्रिमियर कपमा नेपालले आज साउदी अरबसँग खेल्दैछ । खेल अल अमेरत क्रिकेट ग्राउन्ड नेपाली समय अनुसार बिहान ११:४५ बजेबाट सुरु हुनेछ ।

समूह ‘बी’ मा रहेको नेपाल अपराजित रहँदै एक खेल अगावै सेमिफाइनलमा पुगिसकेको छ । नेपाललले आसिफ सेखको एक हजार रन र दीपेन्द्रसिंह ऐरीको ६ छक्का तथा टिमको सन्तुलित प्रदर्शनले विपक्षीलाई दबाबमा राख्दै आइरहेको छ । आज साउदी अरेबियालाई हराउँदै समूह विजेता बनेर अन्तिम चारमा जाने योजनामा छ ।

यसअघि नेपालले ३ खेलबाट ६ अंक जोडेको छ । पहिलो खेलमा नेपालले मलेसियालाई ५ विकेटले पराजित गरेको थियो । यस्तै, शनिबार सम्पन्न दोस्रो खेलमा नेपालले कतारलाई ३२ रनले पराजित गरेको हो । सोमबार तेस्रो खेलमा हङकङलाई ८ विकेटले पराजित गर्दै नेपाल समूह ‘बी’ को विजेता बनेको थियो । नेपाल आफ्नो अपराजित यात्रालाई कायमै राख्न लक्ष्यमा हुनेछ ।

यता, साउदी भने नेपालसँग जित्नै पर्ने दबाबमा छ । ३ खेलबाट २ अंक जोडेको साउदी अंक तालिकाको तेस्रो स्थानमा रहेको छ । साउदीभन्दा एक खेल बढी खेलेको कतारको ४ अंक रहेको छ । +०.४६७ नेटरनेट रहेको साउदी नेपालमाथि सानदार जितसहित सेमिफाइनलमा स्थान बनाउन चाहन्छ । पहिलो खेलमा मलेसियासँग १२ रनले पराजित भएको साउदीले दोस्रो खेलमा हङकङलाई ५५ रनले पराजित गर्दै पुनरागमन गरेको थियो । तर, तेस्रो खेलमा भने साउदी कतारसँग १५ रनले पराजित भयो ।

जारी प्रतियोगितामा आसिफ सेखले एक हजार टी-२० रन पूरा गरे । अहिलेसम्म पाँच अर्धशतक प्रहार गरिसकेका आसिफ एक हजार रन पूरा गर्ने चौथो नेपाली खेलाडी बनेका छन् । दीपेन्द्रसिंह ऐरी टी-२० आईमा १५ सय रन पूरा गर्ने पहिलो नेपाली बनेका छन् ।

तीन खेलमा आसिफले १२४ रन बनाउँदा दीपेन्द्रसिंह ऐरीले ८४, रोहित पौडेलले ७१ र कुशल भुर्तेलले ६८ रन बनाएका छन् । बलिङमा नेपालले विपक्षीलाई दबाबमा राख्न सकेको छ । अलराउन्डर दीपेन्द्र विकेट लिने नेपाली खेलाडीमध्ये सबैभन्दा अगाडि छन् । उनले ६ विकेट लिँदा अविनाश बोहोराले ५ र ललित राजवंशीले चार विकेट लिएका छन् ।

दीपेन्द्र नेपाली टिमबाट सबैभन्दा धेरै छक्का प्रहार गर्ने खेलाडी हुन् । कतारसँगको खेलमा उनले कुशल मल्लको सर्वाधिक छक्का प्रहार गर्ने खेलाडीको रेकर्ड तोडेर आफ्नो नाम गरेका थिए । त्यही खेलमा दीपेन्द्रले एकै ओभरमा ६ छक्कासमेत प्रहार गरेर र २ पटक ६ बलमा ६ छक्का हान्ने पहिलो ब्याटर बने ।