अखबार नेपाल ट्रेन्डिङ

काठमाडौं: आईसीसी विश्वकप क्रिकेट लिग-२ मा नेपाल नामिबियासँग २ विकेटले पराजित भएको छ ।  १६९ रनको सामान्य लक्ष्य पछ्याएको नामिबियाले ४० ओभरमा ८ विकेट गुमाएर जित हात पार्यो ।

नामिबियाका लागि कप्तान जेरार्ड इरासमसले ५६ बलमा ८ चौका र २ छक्कासहित ५२ रन बनाए । यस्तै माइकल भ्यान लिङ्गेनले ३४ बलमा ४ चौका र २ छक्कासहित ३१ रन बनाए । नेपालले नामिबियाका ओपनरद्वय जेपी कोट्जे र निकोलास डेभिनलाई क्रमस ३ र ८ रनमा आउट गरेको थियो ।

नामिबियाले टस जितेर फिल्डिङ रोजेपछि पहिले ब्याटिङ गरेको नेपाल ३७.१ ओभरमा १६८ रनमा अलआउट भयो । नेपालका लागि ओपनिङ ब्याटर आसिफ शेखले अर्धशतक प्रहार गरे पनि अरु ब्याटर चल्न सकेनन् । कप्तान रोहित पौडेलसहित चार ब्याटरले खाता खोल्न सकेनन् भने ६ ब्याटरले दोहोरो अंकमा रन बनाएनन् । ६४ बलमा ८ चौका र १ छक्का प्रहार गरेका आसिफले ५८ रन जोडे । आसिफको यो १२औं एकदिवसीय अर्धशतक हो । उनले एकदिवसीय खेलमा एक शतक पनि प्रहार गरेका छ्न । जारी सिरिजमा उनले नेदरल्यान्ड्सविरूद्धको अघिल्लो खेलमा पनि अर्धशतक प्रहार गर्ने क्रममा नटआउट ५४ रन जोडेका थिए ।

अर्का ओपनर कुशल भुर्तेलले १८ रन जोडे । उनले आसिफसँग ३८ रनको ओपनिङ साझेदारी गरे । उनी सातौं ओभरमा बर्नाल्ड स्कोल्जको एलबिडब्लूको धरापमा परेका थिए । सोहि ओभरमा अनिल साह र अर्को ओभरमा देव खनाल शून्यमा आउट भएपछि नेपाल सुरुमै दबाबमा परेको थियो । नेपालले ८ ओभरमा महत्वपूर्ण तीन विकेट गुमाउँदा ४३ रन जोडेको थियो ।

खेलमा कप्तान रोहित पौडेल पनि चल्न सकेनन् । २४ ओभरमा आउट भएका रोहित ९ बल खेल्दा शून्यमा आउट भए । त्यसपछि कुशल मल्लले  २६ रन जोड्दा  नेपालको रन केही बढेको थियो । दीपेन्द्रसिंह ऐरी र सोमपाल कामी ३४औं ओभरको चार बलको अन्तरमा आउट भए । दीपेन्द्र सो ओभरको दोस्रो बलमा ६ रनमा आउट हुँदा सोमपाल पाँचौ बलमा ४ रनमा आउट भए । ३५औं ‌ओभरमा भीम सार्की स्कोल्जबाट बोल्ड भए । उनले २६ रन बनाए । यस्तै करण केसीले अन्तिम विकेटको रुपमा आउट हुनुअघि १२ रन जोडे ।

नामिबियाका लागि बलिङमा स्कोल्जले ४ विकेट लिए । उनले १० ओभरमा २ मेडन राख्दा ३१ रन खर्चिए । जान निकोलले पनि ४ विकेट लिए । उनले ६.१ ओभरमा ३४ रन खर्चिए । अब शुक्रबार नामिबिया र नेदरल्यान्ड्स तथा आइतबार नेपाल र नेदरल्यान्ड्सबीचको खेलपछि यो सिरिज सकिनेछ ।