अखबार नेपाल ट्रेन्डिङ

काठमाडौं: बंगलादेशको ढाकामा जारी साफ यू-१९ महिला च्याम्पियनसिपमा नेपालले लिगको आफ्नो अन्तिम खेलमा आज भारतसँग खेल्दैछ । शीर्ष दुईमा रहेर प्रतियोगिताको फाइनल खेल्न नेपाललाई जित्नै पर्ने दबाबमा छ ।

जितले नेपाल फाइनल पुग्नेछ भने पराजित भए बाहिरिनेछ । घरेलु टोली बंगलादेश दुई खेल जित्दै फाइनल पुगिसकेको छ । चार टोली सहभागी प्रतियोगितामा आयोजक बंगलादेश दुई खेलबाट ६ अंकसहित शीर्ष स्थानमा छ । नेपाल र भारतको दुई खेलबाटै समान तीन अंक छ । लगातार दुई हार बेहोरेको भुटान अंकविहीन भएर फाइनल होडबाट बाहिरिसकेको छ ।

नेपाल र भारतको समान अंक भएपनि भारत गोल अन्तरमा अघि छ । भारतले ११ गोल गर्दा जम्मा एक गोल मात्र बेहोरेको छ । नेपालले जम्मा दुई गोल गरेको छ भने तीन गोल बेहोरेको छ । त्यसैले पनि भारतविरुद्ध नेपाललाई जित नै चाहिन्छ । भारत भने नेपालविरुद्ध बराबरी खेलेमा पनि फाइनल पुग्नेछ । च्याम्पियनसिपको पहिलो खेलमै नेपाल आयोजक बंगलादेशसँग ३-१ ले पराजित भएको थियो । त्यसपछि नेपालले भुटानलाई १-० ले हराएर पहिलो जित हात पारेको थियो ।

सिंगल राउण्ड रोविनका आधारमा भइरहेको च्याम्पियनसिपमा लिग चरणका खेलपछि शीर्ष दुईमा रहने टोलीले फाइनल खेल्नेछन् । नेपालले अहिलेसम्म च्याम्पियनसिपको उपाधि जित्न सकेको छैन । अहिलेसम्म भएको चार संस्करणमध्ये बंगलादेशले तीन तथा भारतले एकपटक उपाधि जितेको छ । नेपाल दुईपटक उपविजेता बन्दा दुईपटक तेस्रो भएको थियो ।