अखबार नेपाल ट्रेन्डिङ

काठमाडौं: चीनमा जारी १९औं एसियाली खेलकुद (एसियाड) खेलेर नेपाली क्रिकेट टोली स्वदेश फर्किएको छ । क्रिकेट टोली आज बिहान ११:३० मा त्रिभुवन विमानस्थल आइपुगेको थियो ।

त्रिभुवन अन्तर्राष्ट्रिय विमानस्थलमा नेपाली क्रिकेट टोलीको स्वागत विशेष रूपमा गरिएको थियो । नेपाल प्रहरीले टीमका स्वागत गर्न बाजागाजासमेत व्यवस्था गरेको थियो । प्रहरीका खेलाडी दीपेन्द्र सिंह ऐरीले एसियन गेम्स क्रिकेटमा सर्वाधिक छिटो अर्धशतकको विश्वकीर्तिमान कायम गरेका थिए । सम्भवतः त्यसैलाई सेलिब्रेट गर्न प्रहरीले विशेष रूपमा स्वागत गरेको हो ।

कप्तान रोहित पौडेलले सोचेजस्तो नतिजा ल्याउन नसके पनि समग्रमा प्रतियोगिता राम्रो भएको बताए । ऐरीले आफ्नो विश्व कीर्तिमानलाई लिएर खुशी व्यक्त गरे । यस प्रतियोगितामा नेपालले मंगोलिया र माल्दिभ्सलाई सहज रूपमा हराउँदै क्वाटरफाइनलमा स्थान बनाएको थियो । क्वाटरफाइनलमा भने भारतसँग कडा प्रतिस्पर्धामा पराजित भएको हो । भारतसँग खेल हारे पनि नेपालले मन जितेको प्रतिक्रिया सर्वत्रबाट आइरहेको छ ।

नेपालका लागि भारतले दिएको २०३ रनको विजयी लक्ष्य पछ्याएको नेपालले निर्धारित २० ओभरमा ९ विकेट गुमाउँदै १७९ रन बनाएको थियो । भारतविरुद्ध उच्च प्रदर्शन गरेपछि नेपाली क्रिकेटको चौतफी प्रंशसा भएको थियो । समूह चरणमा भने नेपालले मंगोलियाविरुद्ध पहिला ब्याटिङ गर्दै २० ओभरमा ३ विकेट गुमाउँदै ३१४ रन बनाएको थियो ।

मंगोलियालाई ४१ रनले हराउँदै नेपालले २७३ रनको विश्व कीर्तिमानी जित हात पारेको थियो । उक्त खेलमा दीपेन्द्रसिंह ऐरीले ९ बलमै अर्धशतक प्रहार गरेका थिए । क्रिकेटमा कुनैपनि खेलाडीले बनाएको सर्वाधिक छिटो अर्धशतक हो । उक्त अर्धशतक अब तोडिने छैन । दीपेन्द्रले भारतीय पूर्व ब्याटर युवराज सिंहले १२ बलमा २००७ मा इंग्ल्यान्डविरुद्ध बनाएको कीर्तिमान तोडेका थिए ।

कुशल मल्लले ३४ बलमा शतक हानेका थिए । टि-२० आई इतिहासको सर्वाधिक छिटो शतक थियो । उनले भारतीय कप्तान रोहित शर्मा र दक्षिण अफ्रिकी ब्याटर डेविड मिलरको ३५ बलको कीर्तिमान तोडेका थिए । नेपालले उक्त खेलमा एक दर्जन विश्व कीर्तिमान कायम गरेको थियो ।

दोस्रो खेलमा नेपालले माल्दिभ्सलाई ३८ रनले हराएको थियो । नेपाली टोली आइसिसी टि-२० विश्वकप एसिया क्षेत्र तयारी गर्न भारतको नागपुर जादैछ । टोली शुक्रबार भारत जाने सम्भावना छ । विश्वकप छनोट अघि नेपाल, युएई र हङकङबीच असोज ३० देखि कार्तिक ९ गते (अक्टोबर १७ देखी २६) सम्म मुलपानी र टियु क्रिकेट मैदानमा त्रिकोणात्मक सिरिज आयोजना हुनेछ ।

आइसिसी टि-२० विश्वकप एसिया क्षेत्र छनोट कार्तिक १३ देखि २० गते सम्म मुलपानी र टियु क्रिकेट मैदानमा हुँदैछ । समूह ‘ए’ मा नेपाल, सिंगापुर, ओमान र मलेसिया छन् । समूह ‘बी’ मा युएई, बहराइन, हङकङ र एसिया क्वालिफायर ‘ए’ बाट विजेता टोली नेपाल आउनेछ ।

एसिया क्षेत्र छनोट ‘ए’ मा कुवेत, माल्दिभ्स, कतार र साउदी अरेविया मध्य एक टोली आउनेछन् । दोहामा उक्त छनोट जारी हुँदा कुवेत र साउदी अरेविया मध्य एक टोली नेपाल आउने पक्का भएको छ । साउदी र कुवेतबीच आज दिउँसो ४:१५ मा खेल हुनेछ । उक्त खेलको विजेता टोली नेपाल आउनेछ ।

फाइनलमा पुग्ने दुई टोलीले आगमी वर्ष अमेरिका र वेस्टइन्डिजमा हुने टि-२० विश्वकप खेल्न पाउनेछन् । नेपाल उपाधिको प्रमुख दाबेदार टोली हो । नेपाल २०१४ पछि पहिलो पटक टि-२० विश्वकप खेल्ने सोचमा हुनेछ ।