अखबार नेपाल ट्रेन्डिङ

काठमाडौं: चीनको हाङझाउमा जारी १९औं एसियन गेम्समा सहभागी हुन नेपाली राष्ट्रिय क्रिकेट टोली आज त्यसतर्फ प्रस्थान गरेको छ । चीन जाने टोलीलाई नेपाल क्रिकेट संघ (क्यान) ले आज बिदाई गरेको हो ।

गत साता चोटका कारण शल्यक्रिया गरेपछि स्पिनर ललित नारायण राजवंशीले भने एसियाड गुमाएका छन् । अभ्यासका क्रममा त्रिवि क्रिकेट मैदानमा घाइते भएका ललितको स्थान सागर ढकालले लिएका छन् ।

अर्का स्पिनर सन्दीप लामिछाने भने टोलीसँगै चीन गएका छैनन् । बलात्कार अभियोगमा आफुविरुद्धको  पेसी परेसँगै उनी आजको टोली बाहिर थिए । एसियाडमा नेपाल मंगोलिया र मालदिभ्स रहेको समुह ‘ए’ मा रहेको छ । एसियाडमा नेपाली टोलीले बुधबार मंगोलियासँग खेल्दैछ । खेल जेझियाङ क्रिकेट फिल्डमा हुनेछ ।

समुह चरणको अन्तिम खेलमा आगामी आइतबार मालदिभ्ससँग खेल्ने तालिका छ । क्वार्टरफाइनलमा पुगे नेपालले पुनः टेष्ट टोलीसँग खेल्नेछ । क्वार्टरफाइनलमा भारत, पाकिस्तान, श्रीलंका र बंगलादेशले सिधै स्थान बनाएका छन् । एसियाडमा क्रिकेटका खेलहरु १० गतेदेखि २१ गतेसम्म चल्नेछ ।

नेपाली क्रिकेट टोली:

रोहित कुमार पौडेल (कप्तान), आसिफ शेख (विकेटकिपर), विनोद भण्डारी (विकेटकिपर), कुशल भुर्तेल, दीपेन्द्रसिंह ऐरी, कुशल मल्ल, गुलशन झा, करण केसी, अभिनाश बोहरा, सागर ढकाल, विवेक कुमार यादव, प्रतिश जि.सी, सोमपाल कामी, सन्दीप जोरा, सन्दीप लामिछाने ।