अखबार नेपाल ट्रेन्डिङ

काठमाडौं: क्रिकेट खेल्न युएई जान पाउनुपर्ने मागसहित सन्दीप लामिछाने आफ्ना वकिल सरोजकृष्ण घिमिरेको साथमा सर्वोच्च अदालत पुगेर निवेदन दिएका छन् ।

विदेश जान प्रतिबन्ध लगाउने उच्च अदालत पाटनको आदेश बदर गर्न माग गर्दै सन्दीप सर्वोच्च पुगेका हुन् । गत पुस २८ गते उच्च अदालत पाटनले उनलाई धरौटीमा रिहा गर्न आदेश दिए पनि विदेश जान प्रतिबन्ध लगाएको थियो ।

नेपालमा हालै भएको लिग-टु अन्तर्गतको त्रिदेशीय सिरिजमा उत्कृष्ट पुनरागमनसहित १३ विकेट लिएपछि सन्दीपलाई युएई लैजान क्रिकेट संघले पनि पक्रिया अघि बढाएको छ ।

सिरिजकै सर्वाधिक विकेट लिएका सन्दीप लिग २ कै बाँकी ४ खेलका लागि शनिबार जाने टोलीमा परेका छैनन् । अदालतको प्रतिबन्धका कारण टोलीमा नपरेका उनी प्रतिबन्ध फुकुवाको मागसहित सर्वोच्च पुगेका हुन् ।

उनको रिटमा शुक्रबार नै सुनुवाइ हुने सम्भावना छ । सुनुवाइ भएर प्रतिबन्ध फुकुवा भए सन्दीप टोलीसँगै युएई जानेछन् ।

उच्च अदालतले काठमाडौं बाहिर जान अनुमति लिनुपर्ने बताए पनि क्रिकेट खेल्न भने प्रतिबन्ध लगाएको थिएन । क्यानले पनि निलम्बन फुकुवा गरेको थियो । क्यानले उनलाई विदेश लैजान समेत पहल गरिरहेको छ ।

यदि अदालतले यसअघिको निर्णय बदर नगरे नेपाली टोली सन्दीपबिनै यूएई जानेछ । त्यसका लागि क्यानले टोलीसमेत घोषणा गरिसकेको छ ।