अखबार नेपाल ट्रेन्डिङ

काठमाडौं: प्रधानमन्त्री पुष्पकमल दाहाल प्रचण्ड र जनता समाजवादी पार्टीका अध्यक्ष उपेन्द्र यादवबीच सिंहदरबारमा भेटवार्ता भएको छ ।

भेटवार्तामा जसपाका वरिष्ठ नेता राजेन्द्र श्रेष्ठ पनि सहभागी थिए । छोटो समयमा भएको भेटघाटमा जसपा अध्यक्ष यादले उपराष्ट्रपतिको अडानलाई दोहोर्‍याएका थिए । उनले उपराष्ट्रपति दिने भएमात्रै गठबन्धन र सरकारमा समेत सहभागी हुने अडान लिएको स्रोतले बताएको छ ।

‘हाम्रो पार्टीको स्पष्ट माग उपराष्ट्रपति हो । उपराष्ट्रपति पाएमात्रै हामी गठबन्धन ब्युँताउने कुरामा होस् या सरकारमा सहभागी हुने कुरामा होस्, सहभागी हुनेछौं । त्यसबाहेक कुरामा हाम्रो समर्थन रहने छैन ।’

बैठकमा बुधबार साँझ बालुवाटारमा भएको वार्ताका विषयमा पनि चर्चा भएको स्रोतको भनाइ छ । मन्त्रिपरिषद् बैठक बस्ने भएकाले पछि फेरि छलफल गर्नेगरी उनीहरूको छलफल बीचमै रोकिएको थियो ।