अखबार नेपाल ट्रेन्डिङ

काठमाडौं: कप्तान लियोनल मेस्सी सोमबार राति आफ्नै देशको राजधानी ब्युनर्स आयर्समा ट्रफीसहित पुग्दा अकल्पनीय स्वागत भयो ।

गत आइतबार दोहाको लुसेल रंगशालामा साबिक विजेता फ्रान्सलाई टाइब्रेकरमा ४-२ गोल अन्तरले पराजित गर्दै अर्जेन्टिना तेस्रोपटक विश्वकप विजेता बनेको थियो ।

सन् १९८६ पछि विश्व च्याम्पियन बनेका अर्जेन्टिनी खेलाडी घरमा फर्कंदा भव्यताका साथ स्वागत गर्ने र खुसी मनाउने योजनाको तयारीमा समर्थक लागेका थिए ।

अर्जेन्टिनाले विश्व च्याम्पियन बनेको खुसी मनाएको क्षण ३६ वर्षअगाडि थियो । त्यो पनि डिएगो म्याराडोनाले अर्जेन्टिनालाई दोस्रोपटक विश्वकप ट्रफी दिलाउँदा थियो ।

कतारको दोहाबाट विशेष हवाई जहाजमा सवार अर्जेन्टिनी खेलाडीहरूको नेतृत्व मेसीले गरेका थिए । उनले विश्वकप ट्रफी हातमा लिँदै हवाई जहाजको भर्‍याङबाट ओर्लंदा उपस्थित हजारौँ दर्शकको आँखाबाट खुसीको आँसु झरेको थियो ।

अर्जेन्टिनी सरकारले पनि मंगलबार विजयोत्सव मनाउन सार्वजनिक बिदा घोषणा गरेको थियो । सन् १९८६ को विश्वकपमा अर्जेन्टिनाले पश्चिम जर्मनीलाई हराउँदै दोस्रोपटक विश्वकप उपाधि उचालेको थियो ।

त्यसवेला म्याराडोना अर्जेन्टिनी समर्थकहरूको नजरमा हिरो बनेका थिए । यसपालि भने म्याराडोनाकै उत्तराधिकारीका रूपमा हेरिएका मेसी नायक भएका छन् । साढे तीन दशकपछि विश्व च्याम्पियन बनेपछि अर्जेन्टिनी समर्थक मात्र नभएर समग्र खेलाडी नै खुसी छन् ।

मेसीको चाहना

मेसीले कतार विश्वकपको फाइनलको अघिल्लो दिन फ्रान्सविरुद्धको उपाधि भिडन्त नै अन्तिमपटक राष्ट्रिय टोली खेल्ने घोषणा गरेका थिए ।

मेसीले फाइनल खेलसँगै अन्तर्राष्ट्रिय खेलबाट सन्न्यास लिने र क्लबस्तरीयलाई निरन्तरता दिने । लुसेल रंगशालामा अर्जेन्टिना विश्वकप च्याम्पियन भएपछि मेसीले सन्न्यास लिने अनुमान थियो । तर, उनले तत्काल यो योजना नरहेको स्पष्ट पारेका थिए ।

विश्व च्याम्पियन बनेर घर फर्कंदा मेसीले आफ्नो योजना परिवर्तन गरेका छन् । अब मेसीलाई विश्व च्याम्पियन खेलाडीका रूपमा अर्जेन्टिनी जर्सीमा खेल्न मन छ ।

स्थानीय पत्रकारलाई मेसीले भने, ‘अब तत्काल सन्न्यास लिने पक्षमा छैन, विश्व च्याम्पियन भएको जर्सीबाट अन्तर्राष्ट्रिय खेलमा प्रतिस्पर्धा गर्ने इच्छा छ ।’ आफ्नै कप्तानीमा अर्जेन्टिनालाई विश्व च्याम्पियन बनाउने लक्ष्य पूरा भएको उनले बताए । ‘मेरै कप्तानीमा अर्जेन्टिनालाई विश्वकप ट्रफी जित्ने लक्ष्य पूरा भएको छ,’ मेसीले भने, ‘अब विश्व च्याम्पियन खेलाडीका रूपमा खेल्न बाँकी छ ।’