अखबार नेपाल ट्रेन्डिङ

काठमाडौं: बंगलादेशमा आयोजना भएको यू-१५ महिला साफ च्याम्पियनसिप फुटबलको उपाधि नेपालले जितेको छ ।

शुक्रबार भएको डबल राउण्ड रोबिन लिगको अन्तिम खेलमा बंगलादेशसँग १-१ गोलको बराबरी खेल्दै नेपाल च्याम्पियन बनेको हो ।

नेपाली महिला फुटबलको उमेर समूहमा यो ऐतिहासिक उपाधि हो । नेपाली महिला टोलीको कुनैपनि उमेर समूहको यो पहिलो अन्तर्राष्ट्रिय उपाधि हो ।

रोमान्चक खेलमा नेपालकी गोलकिपर तथा कप्तानी गरेका सुजता तामाङले उत्कृष्ट प्रदर्शन गर्दै एक पेनाल्टी बचाएपछि नेपाल च्याम्पियन बनेको हो ।

नेपाली टोलीकी गोलरक्षक सुजाता तामाङ महिला साफ यू१५ च्याम्पियनसिपको उत्कृष्ट गोलरक्षक चुनिएकी छिन् । शुक्रबार नेपाललाई अपराजित रहेर च्याम्पियन बनाउन सुजाताले उत्कृष्ट प्रदर्शन गरेकी थिइन् ।

खेलमा सुरुआती अग्रता नेपालले बनाएको थियो ।  खेलको १४औं मिनेटमा सुशिला केसीले गोल गर्दै नेपाललाई अग्रता दिलाएकी थिइन् ।

तर, खेलको ५४ औं मिनेटमा रुमाले गोल गर्दै बंगलादेशलाई १-१ गोलको बराबरीमा ल्याईन् । त्यसपछि खेलको ८९ औं मिनेटमा बंगलादेशले पेनाल्टी प्राप्त गर्यो ।

बंगलादेशकी बीबी रिताको पेनाल्टी गोलकिपर सुजताले उत्कृष्ट बचाउ गरिन् । त्यसपछि थप गोल भएन र खेल बराबरीमा सकिदा नेपाल च्याम्पियन बनेको हो ।

बराबरीसँगै नेपालले ४ खेलमा अपराजित रहदै १० अंक जोड्यो  । र, शीर्ष स्थानमा रहदै नेपालले उपाधि उचाल्न सफल  भयो ।

बंगलादेश भने ४ खेलमा ७ अंक जोडेर उपविजेता बन्यो । भुटान अंक विहीन रहदै घर फर्कियो । प्रतियोगितामा नेपाल, भुटान र बंगलादेशको सहभागिता रहेको थियो ।