अखबार नेपाल ट्रेन्डिङ

काठमाडौं: मलेसिया भ्रमणमा रहेको नेपालको राष्ट्रिय क्रिकेट टिमले आज घरेलु टोली मलेसियासँग दोस्रो तथा अन्तिम टी-ट्वान्टी खेल खेल्दैछ ।

दुई खेलको टी-ट्वान्टी सिरिज खेल्न मलेसिया पुगेको नेपाललाई दोस्रो खेलमा समेत जित निकाल्दै सिरिज ‘क्लिनस्वीप’ गर्ने ऐतिहासिक अवसर छ । दोस्रो खेल मलेसियाको किनरारा ओभलमा नेपाली समय अनुसार बिहान पौने ८ बजे सुरु हुनेछ ।

प्रतियोगिता अन्तर्गत शनिबार भएको पहिलो खेलमा नेपालले मलेसियालाई ७ विकेटले पराजित गरेको छ । क्वालालम्पुरस्थित किनरारा ओभलमा मलेसियाले दिएको एक सय २९ रनको लक्ष्य नेपालले १८ ओभर ३ बलमा ३ विकेट गुमाएर पुरा गर्यो । नेपालको जितका कप्तान पारस खड्काले अविजित रहदै ८६ रनको अर्धशतकीय इनिङ्स खेले ।

टस जितेर पहिले ब्याटिङ गरेको मलेसियाले २० ओभरमा ९ विकेट गुमाएर एक सय २८ रन बनाएको थियो । मलेसियाका लागि भिरन दिप सिंहले ५७ रनको अर्धशतकीय इनिङ्स खेले । अहमेद फाइज मोहमद नुरले ४५ रन बनाए । यस्तै मोहमद फिट्रीले १२ रन जोड्नु बाहेक अन्य ब्याट्सम्यानले दोहोरो अंक जोड्न सकेनन् । नेपालका लागि करण केसीले ३ विकेट लिए । यस्तै बसन्त रेग्मी र सन्दीप लामिछानेले २/२ विकेट लिए । सोमपाल कामीको नाममा १ विकेट रह्यो ।

सिंगापुरमा आयोजना हुने आईसीसी टी-ट्वान्टी विश्वकप एसिया फाइनलको तयारीका लागि नेपालले मलेसियासँग दुई खेलको सिरिज खेलिरहेको हो । नेपालले मलेसियासँग आइतबार दोस्रो टी-ट्वान्टी खेल्नेछ । सन् २०२० मा अष्ट्रेलियामा हुने विश्वकपको छनोटको रुपमा रहेको फाइनल जुलाई २२ देखि २८ सम्म सिंगापुरमा आयोजना हुनेछ । एसिया फाइनलमा नेपालसहित आयोजक सिंगापुर, मलेसिया, कतार र कुवेत रहेका छन् । नेपालले पहिलो खेल कतारसँग खेल्नेछ ।