अखबार नेपाल ट्रेन्डिङ

एजेन्सी: आईसीसी एकदिवसीय विश्वकप क्रिकेटमा दक्षिण अफ्रिकाले श्रीलंकालाई पराजित गरेको छ । इंग्ल्याण्डको चेस्टरमा शुक्रबार भएको खेलमा दक्षिण अफ्रिकाले श्रीलंकालाई ९ विकेटले पराजित गरेको हो ।

श्रीलंकाले दिएको २०४ रनको मध्यम लक्ष्य दक्षिण अफ्रिकाले ३७ ओभर २ बलमा मात्र १ विकेट गुमाएर पुरा गर्यो । दक्षिण अफ्रिकाको जितमा कप्तान फाप डु प्लेसिस र हसिम अमलाले उत्कृष्ट इनिङ्स खेल्दै १ सय ७५ रनको साझेदारी गरे । श्रीलंकाका लासिथ मालिंगाले १ विकेट लिए ।

टस हारेर पहिले ब्याटिङ गरेको श्रीलंकाले ४९ ओभर ३ बलमा अलआउट हुँदै २०३ रन बनाएको थियो । श्रीलंकाका लागि कुशल परेरा र अभिस्का फर्नान्डोले समान ३०/३० रन बनाए । यस्तै धनन्जय डी सिल्भाले २४, कुशल मेन्डिसले २३ तथा थिसरा परेराले २१ रन बनाए । दक्षिण अफ्रिकाका लागि क्रिस मोरिस र ड्वाने प्रिट्रोरिओसले ३/३ विकेट लिए । कागीसो राबडाको नाममा २ विकेट रह्यो ।

जितसंगै दक्षिण अफ्रिकाले ८ खेलबाट ५ अंक जोडेको छ । तर, दक्षिण अफ्रिका प्रतियोगिताबाट यस अघि नै बाहिरिसकेको छ । श्रीलंकाले भने ७ खेलबाट ६ अंक जोडेको छ । यो हारसंगै श्रीलंकाको शीर्ष चारमा रहदै विश्वकपको सेमिफाइनल पुग्ने सम्भावना कमजोर बनेको छ ।