अखबार नेपाल ट्रेन्डिङ

एजेन्सी: कोपा अमेरिका फुटबलमा उरुग्वेले इक्वेडरलाई ४-० गोल अन्तरले पराजित गर्दै शानदार सुरुवात गरेको छ ।

फरवार्डद्वय लुइस सुआरेज र एडिन्सन काभानीले गोल गरेपछि कोपा अमेरिका २०१९ अन्तर्गत समूह ‘सी’ को पहिलो खेलमा उरुग्वेले इक्वेडरमाथि फराकिलो जित निकालेको हो । अर्को गोल निकोलस लोदेईरोको नाममा रह्यो । पहिलो हाफमै ३-० ले अघि बढेको उरुग्वेले दोस्रो हाफमा एक गोल उपहार पाएको थियो ।

१० खेलाडीमा सिमित इक्वेडरमाथि उरुग्वेले सहज जित हात पारेको हो । २४ औ मिनेटमा जोसे किन्टोस रातो कार्ड खादै मैदान बाहिरिएपछि इक्वेडर १० खेलाडीमा सिमित भएको थियो । लोदेईरोले खेलको छैटौ मिनेटमा उरुग्वेलाई अग्रता दिलाएका थिए । ३३ औ मिनेटमा काभानीले उरुग्वेको अग्रतालाई दोब्बर पारेका थिए । ४४ औ मिनेटमा स्वारेजले उरुग्वेलाई ३-० को स्थितीमा पुर्याएका थिए । अतुर्रो मिनाले ७८ औ मिनेटमा आत्मघाति गोल गरेपछि उरुग्वे ४-० विजयी बनेको थियो । त्यसैगरी गएराति नै भएको अर्को खेलमा कतार र पाराग्वेले २–२ गोलको बराबरी खेल्दै अंक बाँडेका छन् ।