अखबार नेपाल ट्रेन्डिङ

एजेन्सी: इङल्याण्डमा जारी आईसीसी एकदिवसीय विश्वकप क्रिकेट अन्तर्गत आज दुई खेलहरु हुँदैछन् । पहिलो खेलमा अष्ट्रेलिया र श्रीलंका तथा दोस्रो खेलमा दक्षिण अफ्रीका र अफगानीस्तानबीच प्रतिस्पर्धा हुनेछ ।

प्रतियोगिता अन्तर्गत शुक्रबार भएको खेलमा वेष्ट इन्डीजलाई ८ विकेटले पराजित गर्दै इङल्याण्डले तेस्रो जित निकालेको छ । इङल्याण्डको साउथह्याम्टनस्थित रोजबल क्रिकेट मैदानमा वेष्ट इन्डीजले प्रस्तुत गरेको २१३ रनको लक्ष्य पछ्याएको इङल्याण्डले ३३ दशमलब १ ओभरमा २ विकेटको क्षतिमा पुरा गर्यो । इङल्याण्डका लागि जोय रुटले नटआउट १ सय रनको शतकीय पारी खेले भने जोनी बेरस्ट्रोले ४५ रन र क्रीस योक्सले ४० रन बनाए । वेष्ट इन्डीजका स्यानन गाव्रीएलले २ विकेट लिए ।

यसअघि टस हारेर पहिला ब्याटीङ गरेको वेष्ट इन्डिजले ४४ दशमलब ४ ओभरमा सबै विकेट गुमाएर २१२ रन बनाएको थियो । वेष्ट इन्डीजलाई सस्तोमा समेट्न इङल्याण्डका जोफ्रा आर्चर र मार्क वुडले समान ३-३ विकेट लिए भने जोय रुटले २ विकेट लिदाँ लीयम प्लनकेट र क्रीस योक्सको नाममा १-१ विकेट रह्यो । वेष्ट इन्डीजका लागि निकोलस पुरनले ६३ रनको अर्धशतकीय पारी खेले भने सीम्रन हेटमेरले ३९ रन, क्रीस गेयलले ३६ र एन्ड्री रस्सलले २१ रन जोडे ।