अखबार नेपाल ट्रेन्डिङ

काठमाडौं: विश्व फुटबलको सर्वोच्च निकाय फिफाको वरियतामा नेपाल गतवर्षभन्दा ४ स्थान तल झरेको छ । फिफाले शुक्रबार सार्वजनिक गरेको नयाँ वरियता अनुसार नेपालको राष्ट्रिय फुटबल टोली गतवर्षभन्दा ४ स्थान तल झरेर १६५ औं स्थानमा पुगेको हो ।

यसअघि नेपाल १६१ औं स्थानमा रहेको थियो । पछिल्ला दुई अन्तर्राष्ट्रिय मैत्रीपूर्ण खेलपछि नेपालको वरियता झन् खस्किएको हो । नेपालले दुई साताअघि मलेसिया र चाईनिज ताईपेइसंग मैत्रीपूर्ण खेल खेलेको थियो । नेपालले फिफा वरियतामा आफूभन्दा तलको मलेसियासंग २-० को हार व्यहोरेको थियो भने आफूभन्दा ३६ औं स्थानमाथिको चाईनिज ताईपेइसँग १-१ गोलको बराबरी खेलेको थियो । दक्षिण एसियाली देशमा नेपाल तेस्रो स्थानमा छ ।

नेपालभन्दा माथि भारत १०१ औं स्थानमा र माल्दिभ्स १५१ औं स्थानमा रहेको छ । नेपाल भन्दा तल रहेको बंगलादेश १८३ औं, भुटान १८६ औं, श्रीलंका २०१ औं र पाकिस्तान २०३ औं स्थानमा रहेको छ । विश्व वरियतामा बेल्जियम शीर्ष स्थानमा छ भने फ्रान्स दोस्रो, ब्राजिल तेस्रो, ईङ्ल्याण्ड चौंथो र पोर्चुगल पाँचौं स्थानमा रहेका छन् । त्यसैगरी फिफा वरियताको छैठौं स्थानमा क्रोएसिया, सातौंमा स्पेन, आठौंमा उरुग्वे, नवौंमा स्विजरल्याण्ड र दशौं स्थानमा डेनमार्क रहेका छन् ।