अखबार नेपाल ट्रेन्डिङ

काठमाडौं: अखिल नेपाल फुटबल संघ (एन्फा)ले नेपाल सुपर लिग (एनएसएल) चैत २५ देखि आयोजना गर्ने अनुमति दिएको छ ।

एन्फाले बुधबार एनएसएल आयोजक नेपाल स्पोर्ट्स एन्ड इभेन्ट म्यानेजमेन्ट प्रालिलाई प्रतियोगिता आयोजना गर्नका लागि चैत २५ देखि जेठ १ सम्मको लागि स्वीकृति प्रदान गरेको हो ।

खेलाडी अनुबन्धका विषयमा विवाद भएको कारण एनएसएलको टाइसिट ड्र रोकिएको थियो ।

ए डिभिजन लिग क्लबले आफ्नो अनुबन्धमा रहेका खेलाडीलाई एनएसएलले छलफल नै नगरी अन्य क्लबमा अनुबन्ध गरेको भन्दै असन्तुष्टि जनाएका थिए ।

एन्फा अध्यक्ष कर्मा छिरिङ शेर्पाको संयोजकत्वमा विवाद समधान समिति गठन गरेको थियो । समितिको बुधबार बसेको बैठकले एनएसएल गर्न स्वीकृति दिएको हो ।

अब एनएसएलले छिटै नै टाइसिट ड्रका लागि नयाँ मिति सार्वजनिक गर्नेछ ।

एनएसएलमा यस पटक १० टिमको सहभागिता रहेको छ ।