अखबार नेपाल ट्रेन्डिङ

काठमाडौं: झापा गोल्डकपको उपाधिका लागि आज त्रिभुवन आर्मी फुटबल क्लब र झापा–११ बीच प्रतिस्पर्धा हुँदैछ ।

बिर्तामोडस्थित डोमालाल राजवंशी रंगशालामा उपाधिका लागि आर्मी र घरेलु टोली झापा दुवै टोली उपाधि रक्षा गर्न चाहन्छन् ।

सेमिफाइनलमा संकटालाई हराउँदै झापा फाइनलमा प्रवेश गरेको हो भने आर्मीले सेमिफाइनलमा सातदोबाटोलाई हराएको थियो ।

बिर्तामोडस्थित होटल दि किङ्सबरीमा भएको प्रि म्याच प्रेस कन्फ्रेन्समा दुवै टोलीले उपाधि जित्ने रणनीतिका साथ मैदानमा उत्रने बताएका छन् ।

यसअघि तीन पटक आर्मीले झापा गोल्डकपको उपाधि जिति सकेको छ ।

अघिल्लो संस्करणको समेत उपाधि जितेको आर्मीका लागि घरेलु टोली घातक सावित हुन सक्छ ।

झापाले भने चारपटक नै उपविजेतामा चित्त बुझाएको छ ।

पाँचौँ संस्करणको झापा गोल्डकपको उपाधि विजेताले नगद १२ लाख ५५ हजार र उपविजेताले ६ लाख पाँच हजार रुपैयाँ नगद पाउने छन् ।

प्रतियोगिताको सर्वोत्कृष्ट खेलाडीले एक थान मोटरसाइकल पाउने छन् ।

उत्कृष्ट गोलरक्षक, उत्कृष्ट डिफेन्डर, उत्कृष्ट मिडफिल्डर र उत्कृष्ट प्रशिक्षकलाई नगद २१ हजार रुपैयाँ दिइनेछ । प्रतियोगिताको सर्वाधिक गोलकर्ताले नगद २५ हजार पाउनेछन् ।

झापा गोल्डकपले यसपटक झापा–११ का खेलाडी विशाल राई ‘ए’लाई लाइफ टाइम अचिभमेन्ट अवार्ड दिने भएको छ ।