अखबार नेपाल ट्रेन्डिङ

काठमाडौंः जारी सहिद स्मारक ‘ए’ डिभिजन लिग फुटबलको अन्तिम चरण तथा लिगको १२औँ चरणका खेल खेलहरू आजबाट सुरु हुँदैछ ।

अखिल नेपाल फुटबल संघ (एन्फा)ले यसै साताको अन्तिमसम्म शीर्ष डिभिजन लिग सक्काउने गरी तालिका सार्वजनिक गरेको छ ।

बिहीबारबाट तीन दिनसम्म चल्ने अन्तिम चरणका खेलहरु शनिबार समापन हुनेछ ।

एन्फाले यस चरणका खेलहरू सातदोबाटोस्थित एन्फा कम्प्लेक्स र त्रिपुरेश्वरस्थित दशरथ रंगशालामा आयोजना गर्दैछ ।

समापनको खेल बाहेक अन्य ६ खेल दिउँसो १ बजे हुनेछन् ।

आज पहिलो दिन दुई खेल हुनेछ । एन्फा कम्प्लेक्समा च्यासल युथ क्लब र सातदोबाटो युथ क्लब भिड्दा हिमालयन शेर्पा क्लब र फ्रेन्ड्स क्लब दशरथ रंगशालामा आमुनेसामुने हुनेछन् ।

शुक्रबार पनि दुई खेल हुनेछ । दुबै खेल १ बजे हुने छन् । जावलाखेल र संकटा क्लब दशरथ रंगशालामा प्रतिस्पर्धा गर्दा एन्फा कम्प्लेक्समा ब्रिगेड ब्वाइज क्लबले थ्रीस्टार क्लबको सामना गर्नेछ ।

अन्तिम दिन तीन खेल हुने छन् । एन्फामा एनआरटी फुटबल क्लब र नेपाल पुलिस १ बजे खेल्दा सोही समय त्रिभुवन आर्मी फुटबल क्लब र मनाङ मर्स्याङ्दी क्लबले दशरथ रंगशालामा प्रतिस्पर्धा गर्ने छन् ।

यता, लगातार शीर्ष डिभिजन लिग च्याम्पियन भइसकेको मछिन्द्र फुटबल क्लबले एपीएफ फुटबल क्लबको चुनौती सामना गर्दै अपराजित यात्रा कायम राख्ने योजनामा हुनेछ ।

यी दुईबीचको खेल दशरथ रंगशालामा ४:३० बजे सुरु हुनेछ ।