अखबार नेपाल ट्रेन्डिङ

पोखरा: सहारा क्लब पोखराको आयोजनामा पोखरास्थित पोखरा रंगशालामा आजबाट बहुप्रतिष्ठित २०औं संस्करणको आहा रारा गोल्डकप शुरु हुँदैछ ।

प्रतियोगिताको उद्घाटन खेलमा आयोजक सहारा क्लब पोखरा र शसस्त्र प्रहरी बलको एपीएफ क्लबबीच प्रतिष्पर्धा गर्दैछन् ।

सहारा र एपीएफबीचको उद्घाटन खेल दिउँसो २ बजेबाट शुरु हुनेछ ।

प्रतियोगिताको शुरुवाती खेलमा दुवै टोलीले जित सहित शुखद् शुरुवात गर्ने योजना सहित मैदान उत्रिने तयारीमा छन् ।

यस खेलको विजेताले अन्तिम आठमा बिवाइएसी मिनेसोटा युएसएसँग खेल्नेछ ।

प्रतियोगितामा साविक विजेता संकटा क्लब, नेपाल पुलिस क्लब, रुस्लान थ्री स्टार क्लब, नेपाल एपिएफ क्लब, मनाङ मर्स्याङ्दी क्लब, मछिन्द्र क्लब, हिमालयन शेर्पा क्लब, त्रिभुवन आर्मी क्लब, सहारा क्लब र बिवाइएसी मिनेसोटा युएसए गरी कुल १० टिमको सहभागिता रहने छ ।

प्रतियोगिताको विजेता टिमले १० लाख १ हजार र उपविजेता टिमले ५ लाख १ हजार प्राप्त गर्ने छ ।

यस वर्ष पनि स्वर्गीय सूर्यबहादुर केसीको स्मृतिमा उत्कृष्ट ५ विधाको पुरस्कार प्रदान गरिने छ ।

त्यस्तै सर्वोकृष्ट राष्ट्रिय फुटबल खेलाडी सम्मान २०७८ बाट एक जना राष्ट्रिय खेलाडीलाई सम्मान गरिने क्लबले जनाएको छ ।

स्वास्थ्य मापदण्ड पूर्ण रुपमा पालना गरी प्रतियोगिता सञ्चालन गरिने आयोजकले बताएको छ ।

प्रतियोगिताका लागि खोपकार्ड अनिवार्य गरिएको छ ।

प्रतियोगितालाई पहिलो संस्करणदेखि नै हिमश्री फुड्स प्रा.लि.को उत्पादन आहा रारा तयारी चाउचाउले प्रायोजन गर्दै आइरहेको छ ।

त्यस्तै सर्वोकृष्ट खेलाडीको प्रायोजन अप्रिला स्कुटरले गरेको छ भने सर्वाधिक गोलकर्ताको पुरस्कार हङकङ निवासी अधिवक्ता देव गुरुङले प्रायोजन गरेका छन् ।

एकेडेमीमा हाल १४ जिल्लाका २४ जना बालकहरु आश्रित छन् ।

पोखरा–१७ दोबिल्लामा रहेको एकेडेमीमा २०६१ सालदेखि उनीहरुलाई क्लबले आवासीय रुपमा नि:शुल्क स्वास्थ्य, शिक्षा तथा फुटबल प्रशिक्षण प्रदान गर्दै आइरहेको छ ।