अखबार नेपाल ट्रेन्डिङ

काठमाडौं: त्रिवि क्रिकेट मैदानमा आजदेखि नेपाली राष्ट्रिय क्रिकेट टिमको बन्द प्रशिक्षण सुरु भएको छ ।

आईसीसी पुरुष टी-२० विश्वकपको ग्लोबल छनोटका लागि नेपाली टोलीको प्रशिक्षण सुरु भएको हो ।

यही वर्ष सन् २०२२ अस्ट्रेलियामा टी–२० विश्वकप हुँदै छ भने त्यसका लागि फेब्रुअरीमा ओमानमा ग्लोबल छनोट प्रतियोगिता हुँदै छ ।

नेपाल क्रिकेट सङ्घ (क्यान)बाट कारबाहीमा परेका खेलाडीबीच सहमति भएपछि प्रशिक्षण सुरु भएको हो ।

यसअघि क्यानले आईतबारदेखि नै प्रशिक्षण सुरु गर्ने निर्णय गरे पनि कारबाहीमा परेका पूर्व कप्तान ज्ञानेन्द्र मल्ल, उपकप्तान दीपेन्द्र सिंह ऐरी, सोमपाल कामी र कमल सिंह ऐरीसहित १४ खेलाडीले रिपोर्टिङ गरेका थिएनन् ।

क्यानले ज्ञानेन्द्र मल्ल, उपकप्तान दिपेन्द्रसिंह ऐरी, कमलसिंह ऐरी र सोमपाल कामीमाथि गरिएको कारबाही पनि फिर्ता हुने जनाएको छ ।

कप्तानको जिम्मेवारी ज्ञानेन्द्र मल्ललाई नै दिने विषयमा भने थप छलफल गर्नुपर्ने क्यानका पदाधिकारीले बताएका छन् ।

क्यानका अनुसार पीसीआर परीक्षण लगायत प्रक्रिया बाँकी रहेकाले १६ खेलाडी आज अनुपस्थित भएका छन् ।

पीसीआर परीक्षण भएर रिपोर्ट नेगेटिभ भएपनि सागर ढकाल बिरामी छन् भने नन्दन यादव, हरिशंकर साह, विनोद भण्डारी, सुसन भारी र विक्रम सोबको स्वाब संकलन भइसकेको छ तर रिपोर्ट आउन बाँकी रहेकाले यी ६ जना होटलमै छन् ।

यसैगरी पूर्वकप्तान ज्ञानेन्द्र मल्ल, सोमपाल कामी, कमलसिंह ऐरी, दीपेन्द्रसिंह ऐरी, अभिनाष बोहरा, सन्दीप जोरा, रोहित पौडेल, करण केसी र कुशल भुर्तेलको भने स्वाब संकलन हुनै बाँकी छ ।

यी ९ खेलाडी मंगलबारसम्म सहभागी हुने क्यानले जनाएको छ ।

यस्तै कप्तान सन्दीप लामिछाने भने अहिले अस्ट्रेलियामा छन् ।

उनीहरू बाहेक अहिले शरद भेषावकर, मोहम्मद आरिफ शेख, कुशल मल्ल, मोहम्मद आशिफ शेख, साहब आलम, पवन सरार्फ, भीम सार्की, प्रदीप ऐरी, गुलशनकुमार झा, जितेन्द्र मुखिया, विवेककुमार यादव, सौरभ खनाल, राजेशपुलामी मगर र किशोर महतो गरी १४ खेलाडी बन्द प्रशिक्षणमा सहभागी भएका छन् ।