अखबार नेपाल ट्रेन्डिङ

काठमाडौं: विभागीय टिम एपीएफ क्लबले सहिद स्मारक ‘ए’ डिभिजन लिग फुटबलमा पहिलो जित निकालेको छ ।

त्रिपुरेश्वरस्थित दशरथ रंगशालामा सोमबार भएको खेलमा एपिएफले लिगको पाँचौ खेलमा फ्रेन्ड्सलाई ३–१ ले पराजित गर्दै लिगमा पहिलो जित दर्ता गरेको हो ।

खेलको पाँचौ मिनेटमा प्रिजेन तामाङको पासमा जमल एन्थोनी फ्रान्कोइसको वान भर्सेस वानको प्रहारलाई एपिएफका गोलरक्षक युया कुरियामाले उत्कृष्ट बचाउ गर्दा  फ्रेन्ड्स अग्रता लिनबाट चुक्यो ।

सुरुवातमा दवाव झेलेपनि ३०औं मिनेटमा विकी तामाङले गोल गर्दै एपिएफलाई १–० को अग्रता दिलाए ।

त्यसको दुई मिनेटपछि ३२औं मिनेटमा आशिष लामाले गोल गर्दै एपिएफको अग्रता दोब्बर पारे ।

खेलको ५६औं मिनेटमा आशिष लामाले व्यक्तिगत दोस्रो तथा टोलीका लागि तेस्रो गोल गर्दै एपिएफको अग्रता दोब्बर पारे ।

प्रिजेन तामाङले ६८औं मिनेटमा पेनाल्टीमा गोल गर्दै खेललाई ३–१ को अवस्थामा ल्याए ।

जितपछि पुछारमा रहेका एपिएफले तीन स्थान सुधार गर्दै ११औं स्थानमा उक्लिएको छ ।

समान ४ अंक नै रहेपनि गोल अन्तरमा जावलाखेल युथ क्लब र च्यासल युथ क्लबलाई पछि पारेको छ ।

पराजित फ्रेन्ड्स २ अंक जोडेर पुछारमा झरेको छ ।

एपिएफले थ्री स्टारलाई बराबरीमा रोक्दै लिगमा पहिलो अंक जोडेको थियो ।

एपिएफले बिबिसी, च्यासल र सातदोबाटोसँग हार ब्यहोरेको थियो ।

फ्रेन्ड्सले सातदोबाटो युथ क्लब र थ्री स्टारसँग बराबरी खेल्दा संकटा र मनाङसँग हार ब्यहोरेको थियो ।