अखबार नेपाल ट्रेन्डिङ

एजेन्सी: इंग्लिस प्रिमियर लिग फुटबलमा शीर्ष स्थानको म्यानचेस्टर युनाइटेडले लिभरपुलसँग गोलरहित बराबरी खेल्दै अंक बाँडेको छ ।

अर्को खेलमा म्यानचेस्टर सिटीले क्रिष्टल प्यालेसमाथि ४–० को फराकिलो जित निकाल्दै दोस्रो स्थानमा उक्लिएको छ ।

घरेलु मैदानमा लिभरपुलले पहिलो हाफ खेल नियन्त्रणमा राखेको थियो । खेल अवधिभर दुवैले गोलका केहि अवसर सृजना गरेका थिए तर असफल भए ।

लिभरपुलले प्रिमियर लिगमा पछिल्लो ४ खेलमा जित निकाल्न सकेको छैन । यो उसको चौथो खेलमा तेस्रो बराबरी हो ।

बराबरी पछि पनि युनाइटेड अंकतालिकाको शीर्ष स्थानमा यथावत छ । उसको १८ खेलबाट ३७ अंक जोडेको छ ।

समान खेलबाट ३४ अंक रहेको लिभरपुल चौथो स्थानमा छ ।

अर्को खेलमा म्यानचेस्टर सिटीले क्रिष्टल प्यालेसलाई ४–० ले हराउँदा जोन स्टोन्सले २ गोल गरे ।

२६औं मिनेटमा स्टोन्सले केभिन डी ब्रुयेनको पास सदुपयोग गरी सिटीलाई अग्रता दिलाएका थिए ।

खेलको ५६औं मिनेटमा गुन्डोगानले गोल गरे भने ६८औं मिनेटमा स्टोन्सले व्यक्तिगत दोस्रो गोल गरे ।

खेलमा नियमित समय सकिनु २ मिनेटअघि रहिम स्टलिङले ४–० को जित निश्चित गरे ।

जितसँगै सिटी १७ खेलबाट ३५ अंकका साथ तालिकाको दोस्रो स्थानमा उक्लिएको छ ।

दुई खेल बढी खेलेको क्रिष्टल प्यालेस २३ अंकसहित १३ औं स्थानमा छ ।