अखबार नेपाल ट्रेन्डिङ

काठमाडौं: भारतमा जारी इन्डियन प्रिमियर लिग क्रिकेट आईपीएलमा दिल्ली क्यापिटल्स प्ले अफमा प्रवेश गरेको छ । नेपाली राष्ट्रिय टिमका लेग स्पिनर सन्दीप लामिछाने सम्मिलित दिल्लीले हिजो भएको खेलमा बैंगलोरलाई १६ रनले पराजित गरेको हो ।

जितसंगै दिल्लीले प्ले अफमा स्थान पक्का गरेको हो । दिल्लीले दिएको एक सय ८८ रनको लक्ष्य पछ्याएको बैंगलोरले ७ विकेट गुमाएर एक सय ७१ रन मात्र बनाउन सक्यो । ओपनर पार्थिव पटेलले बनाएको ३९ रन टोलीको सर्वाधिक स्कोर बन्यो ।

विराट कोहलीले २३, एबीडी भिलियर्स १७ रनमा आउट भएको खेलमा पुछारका खेलाडी मार्कोस स्टोनले ३२ रन बनाए । बैंगलोरलाई दबाबमा राख्न अमित मिश्रा र कागिसो राबाडाले समान २/२ विकेट लिए । नेपालका स्टार सन्दीपले तीन ओभरमा विना विकेट ३६ रन खर्चिएका थिए ।

टस जितेर दिल्लीले पहिले ब्याटिङ गर्दै निर्धारित २० ओभरमा ५ विकेट गुमाएर एक सय ८७ रन बनाएको थियो । दिल्लीका लागि कप्तान श्रेयस एयर र शिखर धवनले अर्धशतकीय इनिङ्स खेले । कप्तान एयरले ५२ तथा धवनले ५० रन बनाए ।

जितसंगै दिल्ली पहिलो पटक आईपीएलको प्ले अफमा पुग्न सफल भयो । शीर्ष स्थानमा उक्लिएको दिल्लीले १२ खेलबाट १६ अंक जोडेको छ । दोस्रो स्थानको चेन्नई सुपर किंग्सको पनि १६ अंक रहेको छ । चेन्नई यसअघि नै प्ले अफमा पुगिसकेको छ ।