अखबार नेपाल ट्रेन्डिङ

काठमाडौं: ईङ्लिस प्रिमियर लिग फुटबलमा लिभरपुल पुन शीर्ष स्थानमा उक्लिएको छ । घरेलु मैदान एनफिल्डमा हुडर्सफिल्डलाई ५-० गोल अन्तरले पराजित गर्दै लिभरपुलले शीर्ष स्थानमा पुनरागमन गरेको हो । फराकिलो जित सहित लिभरपुलले म्यानचेष्टर सिटीमाथि दबाब बढाएको छ ।

शीर्ष स्थानमा उक्लिएसँगै दुई अंकको अग्रता लिन समेत सफल भएको छ । शीर्ष स्थानको लिभरपुलले ३६ खेलबाट ९१ अंक जोडेको छ । एक खेल कम खेलेको दोस्रो स्थानको म्यानचेष्टर सिटीको ८९ अंक छ । खेलको १५ सेकेन्डमै लिभरपुलका नाबी केइटाले गोल गर्दै लिभरपुललाई सुरुवाती अग्रता दिलाए । यस सिजन रेलिगेशनमा परेको हुडर्सफिल्डमाथि सुरुवातबाटै आक्रमक देखिएको लिभरपुलले २३औ मिनेटमा अग्रतालाई दोब्बर बनायो ।

साडियो मानेले घरेलु टोलीको अग्रतालाई दोब्बर बनाएका थिए । मोहमेद सलाहाले ईन्जुरी समयमा गोल गर्दै घरेलु टोलीलाई पहिलो हाफमै ३–० को अग्रता दिलाए । ६६ औ मिनेटमा मानेले व्यक्तिगत दोस्रो गोल गर्दै लिभरपुलको अग्रता फराकिलो बनाए । ८३ औ मिनेटमा सलाहाले गोल गर्दै लिभरपुललाई फराकिलो जित दिलाउन सफल रहे । लिभरपुलले लिगमा अब दुई खेल खेल्न बाँकी छ । उसले अब न्युक्यासल र उल्भ्ससंग प्रतिस्पर्धा गर्नेछ । उपाधिको अर्को दाबेदार म्यानचेष्टर सिटीले वर्नली, लेस्टर सिटी र ब्रिङ्टोनसंग खेल्न बाँकी छ ।