अखबार नेपाल ट्रेन्डिङ

काठमाडौं: चालु आर्थिक वर्षको सातदेखि नौ महिनासम्ममा आर्थिक क्षेत्रसँग सम्बन्धित विभिन्न आंकडाहरुको अध्ययनबाट औपचारिक क्षेत्रको जिडिपी ६.८१ प्रतिशले बढेर ३० खर्बबाट ३४ खर्ब पुग्ने केन्द्रीय तथ्याङक विभागले प्रक्षेपण गरेको छ । समग्र औद्योगिक क्षेत्रलाई प्राथमिक, द्वितिय र सेवा क्षेत्रमा विभाजन गरेर अध्ययन गरिएको विभागले जनाएको छ ।

२७.५९ प्रतिशत रहेको प्राथमिक क्षेत्रको योगदान गत वर्षको भन्दा ५.१ प्रशितले बढी हो । प्राथमिक क्षेत्र अन्तर्गत कृषि, वन, मत्स्य, खानी तथा उत्खनन् पर्दछन् । त्यस्तै निर्माण, ग्यास, उद्योग र विद्युत, पानी समेटिएको द्वितीयक्षेत्रको योगदान गत वर्षको तुलनामा ८ दशमलब एक प्रतिशतले बढेर १४.६ प्रतिशत रहेको छ । जिडिपीमा सबैभन्दा बढी योगदान सेवा क्षेत्रको ५७.८१ प्रतिशत रहेको छ । सेवा क्षेत्रको योगदान गत वर्षको भन्दा ७.२९ प्रतिशतले बढी हो ।

त्यस्तै औद्योगिक वर्गिकरण अनुसार अर्थतन्त्रमा योगदान कृषिक्षेत्रको २६.९८ र गैर कृषि क्षेत्रको ७३.०२ प्रतिशत रहेको छ । यसअन्तर्गत कृषि तथा वनको २६.५ प्रतिशत, मत्स्यको ०.४८, खानीको ०.६०, उद्योगको ५.५९, विद्युत ग्यास तथा पानीको १.२५, निर्माणको ७.७७, थोक तथा खुद्रा व्यापारको १४.३७, होटेल तथा रेस्टुरेन्टको २.०५, यातायात, सञ्चार तथा भण्डारको ७.२३, वित्तिय मध्यस्थताको ६.३२, रियल स्टेट, रेन्टिंग तथा व्यासायिको ११.५३, सार्वजनिक प्रशासन तथा रक्षाको २.७१, शिक्षाको ७.०७, स्वस्थ्य तथा सामाजिक कार्यको १.७५ प्रतिशत र अन्यको ४.७८ प्रतिशत योगदान रहेको तथ्यांकमा उल्लेख छ ।