मन्डेकाजी सहित ७ खेलाडीलाई राष्ट्रिय प्रतिभा सम्मान
वि.सं.२०७७ कात्तिक २९ शनिवार ०८:५६
काठमाडौं: युवा तथा खेलकुद मन्त्रालयले १३ औं दक्षिण एशियाली खेलकुद सागमा दोहोरो स्वर्ण पदक बिजेता कराँतेका मण्डेकाजी श्रेष्ठ, तेक्वान्दोकी आयशा शाक्य, गल्फका सुवास गुरुङसहित ७ खेलाडीलाई राष्ट्रिय प्रतिभा सम्मानबाट पुरस्कृत गर्ने भएको छ ।
मन्त्रालयले आवेदन आएका २७ खेलाडी, १२ खेल प्रशिक्षक, ३ खेल निर्णायक, ४ खेल व्यवस्थापक र चिकित्सक, २ खेल संघ र विधा नखुलेका ४ गरी जम्मा ५२ वटा आवेदनहरु प्राप्त भएको र त्यसलाई राष्ट्रिय खेलकुद प्रतिभा सम्मान कार्यविधि बमोजिम ९ सदस्य रहेको समितिबाट मूल्यांकन गर्दा उच्चतम अंक प्राप्त गर्ने खेल प्रतिभाहरु र खेलसंघलाई नगद सम्मान गर्ने जनाएको छ ।
यस्तै साईक्लिङकी लक्ष्मी मगर, एत्लेटिक्सकी सन्तोषी श्रेष्ठ, शारीरिक सुगठनका समिर श्रेष्ठ र भारत्तोलनका विकास थापा पनि राष्ट्रिय प्रतिभा सम्मानबाट पुरस्कृत हुने सुचिमा रहेका छन् ।
कराँतेका प्रशिक्षक कुशल श्रेष्ठ र तेक्वान्दो प्रशिक्षक नविनकुमार श्रेक्ष्ठ, जुडोका निर्णायक धर्मकुमार श्रेष्ठ, चिकित्सक डा.ज्ञानेन्द्रविक्रम शाह र नेपाल गल्फ संघलाई पनि पुरस्कृत गरिने मन्त्रालयले जनाएको छ ।
यसबाहेक खेल प्रायोजकमा काठमाडौं महानगरपालिका र कतार एयरवेजलाई खेलकुद विकास र प्रवद्र्घनमा विभिन्न खेलहरुमा आर्थिक सहयोग गरी खेलाडीहरुको मनोबल उच्च राख्न पु¥याएको योगदानको कदर स्वरुप पुरस्कृत गर्ने मन्त्रालयले जनाएको छ ।
राष्ट्रिय खेलकुद प्रतिभा सम्मान कार्यविधि २०६८, (तेस्रो संशोधन २०७५ बमोजिम) सदस्य रहेको समितिबाट प्राप्त भएका आवेदनहरुको मूल्यकंन गर्दा उच्चतम अंक प्राप्त गर्नेलाई पुरस्कृत गर्न लागिएको मन्त्रालयले जनाएको छ ।
वि.सं.२०७७ कात्तिक २९ शनिवार ०८:५६