अखबार नेपाल ट्रेन्डिङ

काठमाडौं: ब्याडमिन्टनको सामग्री खरिदमा भएको भनिएको भ्रष्टाचारका प्रमाण पेश गर्न उपसमितिले सात दिनको समय दिएको छ ।

राष्ट्रिय खेलकुद परिषदबाट परिषद्का (राखेप) सदस्य गोविन्द प्रसाद भट्टराईको संयोजकत्वमा गठित ५ सदस्सीय ‘१३ औँ साग ब्याडमिन्टन खेल सामग्री खरिद वितरणमा अनियमितता तथा अनियमित रुख कटान सम्बन्धि छानबिन उपसमिति’ को पहिलो बैठकले यस्तो निर्णय गरेको हो ।

सागमा ब्याडमिन्टन खेलाडीको जुत्ता खरिदका लागि मात्र २ लाख ७० हजार रुपैयाँ खर्च भएको देखिन्छ । जब कि सागका बेला नयाँ जुत्ता नपाएका खेलाडीहरुले किनिएको भनिएको जुत्ता अहिलेसम्म पनि पाएका छैनन् ।

परिषदबाट प्राप्त कार्यादेश बमोजिम बसेको उपसमितिको बैठकबाट छानबिन कार्यको टिओआर निर्माण, छानबिन कार्यलाई विभिन्न चरणहरुमा बाडेर अगाडि बढ्ने, सदस्यहरुलाई जिम्मेवारी बाँडफाड गर्ने निर्णय भएको उपसमितिले जनाएको छ ।

सरोकारवालाले उल्लेखित छानबिन सम्बन्धि कुनै गुनासो, सुझाव, निवेदन लगायत प्रमाण कागजात पेश गर्न सात दिन (यहि भदौ १२ गते सम्म) को समय प्रदान गर्ने निर्णय समेत भएको छ ।