अखबार नेपाल ट्रेन्डिङ

एजेन्सीः विश्व फुटबल महासंघ (फिफा)ले कोरोना भाइरस (कोभिड–१९) को महामारीसँग लड्न च्यारिटी खेल खेलाउने भएको छ । कोरोनाको संक्रमण विरुद्ध लड्न आर्थिक रकम जुटाउनका लागि फिफाले च्यारिटी म्याचको तयारी गरेको विदेशी समाचार माध्यमहरुले जनाएका छन् ।

अध्यक्ष जियानी इन्फान्टिन्होले भने ‘कोरोनाको महामारी विरुद्ध फिफा पनि एकजुट हुन चाहान्छ, त्यसैले आर्थिक साहयताका लागि च्यारिटी म्याचको योजना छ ।’ फिफाले महामारीको समयमा जहाँजहाँबाट जेजस्तो सकिन्छ सोही अनुसार सहयोगगर्ने प्रतिवद्धता पनि ब्यक्त गरेको छ । च्यारिटी म्याचले फिफाको खेलकुद सञ्जाल अझै ब्यापक बनाउने विश्वास गरिएको छ ।

च्यारिटी खेल कहाँ र कहिले गराउने बारेमा भने पछिल्लो बैठकमा छलफल हुने उल्लेख गरिएको छ । फिफा फाउण्डेसनका कार्यकारी निर्देशक यूरी जोर्कफका अनुसार म्याच आयोजना स्थल, मिति, प्रतिस्प्रधीहरुको बारेमा उपयुक्त मौका पारेर घोषणा गरिनेछ । उनले भनेका छन् , ‘फिफा विचाराधीन छ, सबै स्वास्थ्य सम्बन्धि नियमको पालना गरेर कोरोनाको संक्रमण केही कम भएपछि फिफाले खेल आयोजना गर्नेछ ।’

च्यारिटी खेलबाट फिफाले कोरोनाको मारमा परेको फुटबललाई संगठित रहन पनि अपिल गर्नेछ भने, खेलबाट उठेको रकम कस्तो प्रकारमा खर्च गर्ने भन्नेबारेमा पनि पछि छलफल हुनेछ ।