अखबार नेपाल ट्रेन्डिङ

काठमाडौं: वागमती प्रदेशमा विद्युतीय माध्यमबाटै सवारीसाधनको सम्पूर्ण कर तिर्न सकिने भएको छ ।

प्रदेशले यातायात व्यवस्थापन सूचना प्रणाली (TIMS) सञ्चालनमा ल्याएको छ ।

नागरिकले घरमै बसेर अनलाइन प्रणालीमार्फत आफ्नो सवारीसम्बन्धी विवरण हेर्न, अद्यावधिक गर्न, प्रदेश सरकारलाई तिर्नुपर्ने करका बारेमा जानकारी लिन सक्नेछन् ।

सेवाग्राही स्वयंले नै आफ्नो सवारीसाधन तथा अनुमतिपत्रको दर्ता, नवीकरण, जरिवाना, उल्लङ्घन तथा कर बाँकी बक्यौताको स्थिति आदिको अनलाइनबाटै गर्न सकिने व्यवस्था छ ।

मन्त्रालयका अनुसार सवारीधनीले आफ्नो सवारी साधनसम्बन्धी विवरण अद्यावधिक गर्न मन्त्रालयको यातायात व्यवस्था सूचना प्रणालीको वेब पोर्टलमा गई मोबाइल नम्बर भेरिफाई गरी आफ्नो सवारीसाधन सम्बन्धी विवरण प्रविष्टि गर्न सकिने व्यवस्था रहेको छ ।

त्यसबाहेक नागरिक एपमा रहेको सवारी कर पोर्टलमा गई आफ्नो सवारी साधनसम्बन्धी विवरण प्रविष्टि गर्न सक्नेछन् ।

संघीय सरकारले समेत डिजिटल नेपाल योजना अन्तर्गत सरकारले नागरिक एप सार्वजनिक गरी सवारीसाधन कर एपमार्फत नै तिर्नसक्ने व्यवस्था गरेको हो ।

सेवाग्राहीले यातायात व्यवस्था सूचना प्रणालीको वेब पोर्टल वा नागरिक एप जहाँबाट पनि कर तिर्न सक्नेछन् ।

हाल वागमती सरकारले कनेक्ट आईपीएस मार्फत भुक्तानी गर्नसक्ने व्यवस्था गरेको छ । सरकारले विस्तारै राष्ट्र बैंकबाट अनुमति पाएका भुक्तानी सेवामार्फत रकम तिर्न सकिने व्यवस्था गर्नेछ ।

कसरी लिने अनलाइन सेवा ?

सेवा लिनको लागि वेब ब्राउजरमा ‘https://tmis.bagamati.gov.np’ खोल्नुपर्नेछ । त्यसपछि सवारी धनी लगइन पोर्टल खुल्नेछ ।

अनलाइन सेवा सुचारु गर्नको लागि ‘नयाँ दर्ता’मा क्लिक गर्नुपर्नेछ । त्यहाँ आफ्नो मोबाइल नम्बर राखेर खाता खोल्दा मोबाइलमा म्यासेज आउँछ । त्यस अनुसार लगइन गर्नुपर्नेछ ।

लगइनपछि सवारीसाधन प्रोफाइलमा थप गर्ने स्थानमा क्लिक गरी आफ्नो सवारीसाधन दर्ता रहेको विवरण थप गरी प्रोफाइल अपडेट गर्न सकिन्छ ।

आफ्नो वास्तविक विवरण नदेखिए पनि आफैँले सच्याउन सकिन्छ ।

लगइनको सबै काम सकिएपछि आफूले बुझाउनुपर्ने जम्मा राजस्व रकम देखाउँछ । राजस्व तिर्नको लागि कनेक्ट आईपीएस, इ–सेवा, खल्ती लगायतका भुक्तानी प्रदायकमार्फत कर तिर्न सकिन्छ ।

तर कर तिर्नको लागि आफ्नो बीमाको नवीकरण गर्नुपर्छ । बीमाको लागि अनलाइनमार्फत नै आफूले चाहेको कम्पनीसँग गर्न सकिन्छ ।

कर तिरेपछि क्यूआर कोर्ड जेनेरेट हुन्छ । ट्राफिक प्रहरीले राजस्व तिरे नतिरेको क्यूआर कोडमार्फत नै हेर्न सक्नेछ ।