अखबार नेपाल ट्रेन्डिङ

काठमाडौं: चिकित्सा शिक्षा सरोकार तथा संघर्ष समितिले माइतीघर मण्डलामा धर्ना दिएको छ । चिकित्सा क्षेत्रमा देखापरेको विभिन्न समस्या समाधान गर्न त्यससँग सम्बन्धित विद्यार्थी एवम् पेसाकर्मीहरूले २७ साउनदेखि आन्दोलन तथा धर्ना कार्यक्रम जारी राखेका हुन् ।

संघर्ष समितिको जारी धर्ना तथा प्रदर्शनको क्रममा उनीहरुले निरंकुश, स्वेच्छाचारी चिकित्सा शिक्षा ऐन संसोधन गर्नुपर्ने, सिटिइभिटी को तुरुन्त पुर्नसंरचना गर्नुपर्ने , प्रि-डिप्लोमा तहका स्वास्थ्य कार्यक्रमलाई स्तरउन्नति गर्न बाँकी रहेका संस्थाहरुको स्तरउन्नती गरी तत्काल भर्ना खोल्नुपर्ने माग राखेका छन् ।

त्यस्तै, आयोग र सिटिइभिटीको बदनियतले बन्द भएका नर्सिङ्ग कलेजहरुमा तत्काल भर्ना खोल्नुपर्ने लगायतका १४ सुत्रीय माग राखेका छन् । ‘राज्यले नीति बनाउने कि बेथिति ?, एमइसी गर्दैछ भ्रमको खेती, युवा विद्यार्थी विदेशमा बेची, प्राविधिक शिक्षा मास्न पाइँदैन, विभेदकारी एमइसी चाहिँदैन’ जस्ता नारा लेखिएका प्लेकार्ड देखाइ उनीहरुले प्रदर्शन गरेका हुन् ।