अखबार नेपाल ट्रेन्डिङ

काठमाडौं: मिर्गौला प्रत्यारोपणका लागि अस्पताल भर्ना हुनुभएका प्रधानमन्त्री केपी शर्मा ओली १२ दिनपछि शुक्रबार त्रिवि शिक्षण अस्पतालबाट डिस्चार्ज हुनुभएको छ । प्रधानमन्त्री ओली शुक्रबार बेलुकी ६:३० बजे अस्पतालबाट डिस्चार्ज हुनुभएको हो ।

गएको फागुन १९ गते अस्पताल भर्ना भई २१ गते मिर्गौला प्रत्यारोपण गरिएका प्रधानमन्त्री ओलीको स्वास्थ्यमा उल्लेख्य सुधार भएपछि डिस्चार्ज गरिएको त्रिवि शिक्षण अस्पतालका कार्यकारी निर्देशक प्रेमकृष्ण खड्गाले बताए । चिकित्सकहरुले प्रधानमन्त्री ओलीको भाइटल र ल्याब सूचकहरु राम्रो अवस्थामा रहेको बताएका छन् ।

डिस्चार्जपछि पनि प्रधानमन्त्री नियमित फलोअफमा रहने उनका नीजि चिकित्सक डा. दिव्यासिंह शाहले विज्ञप्तिमार्फत जानकारी दिएका छन् । आवश्यक सतर्कताका साथ आफ्नो नियमित सबै काम गर्न सक्ने अवस्थामा प्रधानमन्त्री भएपनि नियमित चिकित्सकको निगरानीमा हुनुहुनेछ । प्रधानमन्त्री डिस्चार्ज हुनुअघि मन्त्रीहरु अस्पताल पुगेका थिए ।

मिर्गौला प्रत्यारोपण गराएको १०औँ दिन डिस्चार्ज हुनुभएका ओलीलाई उहाँकी भाञ्जी नाता पर्ने समीक्षा संग्रौलाले मिर्गौला दिएका थिए । संग्रौला यसअघि नै डिस्चार्ज भईसकेका थिए । प्रधानमन्त्री ओलीको १२ वर्षअघि भारतको एपोलो अस्पतालमा मिर्गौला प्रत्यारोपण गरिएको थियो ।