अखबार नेपाल ट्रेन्डिङ

काठमाडौं: मिर्गौलाको सफल प्रत्यारोपण गरिएपछि प्रधानमन्त्री केपी शर्मा ओलीलाई पोस्ट आपरेटिभ वार्डमा सारिएको छ । त्रिवि शिक्षण अस्पतालमा बुधबार बिहान १० बजेदेखि सुरु भएको शल्यक्रिया दिउँसो पौने ३ बजे सकिएको थियो ।

मिर्गौला प्रत्यारोपणका लागि सोमबार त्रिवि शिक्षण अस्पतालको भीआईबी क्याबिन ६०१ मा भर्ना भएका ओलीलाई शल्यक्रियापछि पोस्ट आपरेटिभ वार्डको आईसीयुमा राखिएको छ । उनलाई मिर्गौला दिएकी भाञ्‍जी समीक्षा संग्रौला ज्ञवालीलाई पनि पोस्ट आपरेटिभ वार्डकै आईसीयुमा राखेर चिकित्सकले निगरानी गरिरहेका छन् । ओलीलाई मृगौला दान गर्ने समीक्षाको स्वास्थ्य अवस्थामा पनि सामान्य रहेको छ ।

प्रत्यारोपणमा संलग्‍न मिर्गौला प्रत्यारोपणपछि अप्रेशन थिएटरबाट पोस्ट अपरेटिभ वार्डमा सारिएका प्रधानमन्त्री ओलीको साढे ४ बजे होस खुलेको थियो । उपचारमा संलग्न चिकित्सकका अनुसार होस खुलेपछि प्रधानमन्त्री चल्मलाउन थालेका छन् । प्रधानमन्त्रीको स्वास्थ्य अवस्था स्थिर रहेको त्रिवि शिक्षण अस्पतालले जनाएको छ । अस्पतालका अनुसार प्रधानमन्त्री ओलीको ‘प्रत्यारोपित मृगौलाले काम गरेको जनाएको छ ।

प्रधानमन्त्रीको आत्मविश्‍वास जस्तै अप्रेशन पनि सफल भएको प्रत्यारोपणमा संलग्न प्रा. डा. प्रेम ज्ञवालीले बताए । डा. ज्ञवालीका अनुसार मिर्गौला प्रत्यारोपण गरेको १५ मिनेटमा पिशाव लाग्‍नुपर्ने हुन्छ । प्रधानमन्त्री ओलीको हकमा पनि १५ मिनेटभित्रै पिसाव लागेको उनले जानकारी दिए । १५ मिनेटभित्रै पिसाव लागेपछि चिकित्सकहरुले प्रधानमन्त्री ‘डेन्जर जोन’ बाट बाहिर निस्किएको भन्दै खुसी साटासाट गरेका थिए ।

मिर्गौलाले काम गर्न थालिसकेकाले अबको केही साता चिकित्सकहरुले कडा निगरानी गर्नुपर्ने बताएका छन् । करिब ८ सय जनाको मिर्गौला प्रत्यारोपण गरिरसकेको त्रिवि शिक्षण अस्पतालमा ओलीको शल्यक्रियामा १५ जना भन्दा नेपाली र भारतीय चिकित्सक खटिएका थिए ।

प्रधानमन्त्री ओलीको मृगौला प्रत्यरोपणका लागि शल्यचिकित्सा टोलीमा प्रा.डा.उत्तमकुमार शर्मा, प्रा.डा. प्रेम ज्ञवाली र अनन्त कुमार लगायतको टोली सहभागी थिए । त्यसैगरि डा. पवनराज चालिसे, डा. सुमन चापागाईं, डा. सुजित पौडेल र डा. मनीष प्रधान पनि थिए । उनीहरुसँगै पहिलो पटक ओलीको मिर्गौला प्रत्यारोपण गरेका भारतीय डा. अनन्त कुमार पनि प्रत्यारोपण टोलीमा थिए । मृगौला प्रत्यारोपण चिकित्सा टोलीमा प्रा.डा. दिब्यासिंह शाह, डा. महेश सिग्देल, डा. मुकुन्द काफ्ले र डा. रविन नेपाली लगायतको टोली सहभागी थियो ।