अखबार नेपाल ट्रेन्डिङ

काठमाडौं: आज खण्डग्रास सूर्यग्रहण लाग्दैछ । नेपाली समय अनुसार अहिले बिहानको ८ बजेर ४२ मिनेटमा ग्रहण शुरु हुनेछ भने १० बजेर १ मिनेटमा र ११ बजेर ३१ मिनेटमा मोक्ष अर्थात समाप्त हुनेछ । नेपाली र अग्रेजी दुबै क्यालेन्डरमा यो बर्षको अन्तिम आजको ग्रहणको कुल समय २ घण्टा ४९ मिनेटको रहनेछ ।

यो खण्डग्रास सूर्यग्रहण नेपाल, भारत, श्रीलंक लगायत एशियाका सबै देश, हिन्दमहासागर, मलेशिया, पूर्वी युरोप, उत्तररपश्चिम ऑस्ट्रेलिया, पूर्वी अफ्रीका सहित विश्वका अधिकांश ठाउँबाट देख्न सकिनेछ । विशेष यो खण्डग्रास सूर्यग्रहण पश्चिम र दक्षिणको बीच तर्फबाट स्पर्श भई पूर्व र दक्षिण को बीचमा मोक्ष हुनेछ ।

काठमाडौंको आकाशबाट ग्रहणको समयमा ४९ प्रतिशत सूर्यको भागमा ग्रहण देख्न सकिने खगोल शास्त्रीहरुले बताएका छन । ग्रहणको समयमा भोजन निषेध हुनुका साथै पकाउने, भूट्ने, बनाउने, काट्ने, बिभिन्न औजारको प्रयोग गर्ने, भूमी खनन गर्ने, शुभ कार्यको प्रारम्भ गर्ने, मलमूत्र त्याग गर्ने, कपाल कोर्ने, दन्तमञ्जन गर्ने, चेक तथा अन्य महत्त्वपूर्ण कागजातहरू आदिमा हस्ताक्षर गर्ने कार्य तथा देवताहरूको मूर्ति तथा तुलसीको वृक्ष स्पर्श गर्ने कार्य पूर्णरुपले निषेध हुन्छ ।

यसका साथै विशेषगरी ग्रहणको समयमा गर्भवती महिलाहरू घर बाहिर निस्कनु हुँदैन यदि निस्कनै परेमा तुलसीपत्र, कुश, चन्दन साथमा राखेरमात्र घर बाहिर निस्कनु पर्दछ भन्ने धार्मिक बिश्वास रहेको छ । ग्रहणको समयमा ग्रहण स्पर्शभएसंगै नदी, तलाउ, पोखरी, तिर्थस्थान, खोला, समुन्द्र आदिमा स्नान गर्ने र त्यसै पूण्यकाल अर्थात् ग्रहणको समयमा यथाशक्ति एवं भक्तिले जनावर, चराचुरूङ्गी, नीमुखा प्राणि तथा असहाय प्राणिहरूलाई दान तथा सहयोग गर्नु निक्कै राम्रो मानिन्छ ।

आजको ग्रहण हेरेमा मेष राशीको लागी मानहानी हुने, वृषको लागी कष्ट हुने छ भने मिथुनलाई स्त्रीपीडा हुने, कर्कटलाई सुख, सिंहलाई चिन्ता बढ्ने, कन्यालाई व्यथा बढ्ने, तुलालाई श्री प्राप्ति हुने, बृश्चिकलाई क्षति हुने, धनुलाई घात हुने, मकरलाई खर्च बढ्ने कुम्भलाई लाभ हुने र मीनलाई सुखदायी हुने ज्योतिष बिज्ञानले बताएको छ ।