अखबार नेपाल ट्रेन्डिङ

काठमाडौं: पश्चिमी वायुको प्रभावका कारण देशभरको मौसम बदलीभै पानी पर्ने सम्भावना रहेको मौसम विभागले जनाएको छ ।

पश्चिमी वायुको प्रभावका कारण अबको तीन दिन देशभरकै मौसम सामान्य बदली भई पानी पर्ने सम्भावना रहेको मौसमविद्ले जनाएका छन् । काठमाण्डौ सहित देशका धेरैजसो ठाउँमा आज दिउँसो पानी पर्ने सम्भावना रहेको छ भने उच्च पहाडी तथा हिमाली भेगमा हल्का हिमपातको समेत सम्भावना रहेको छ ।

भोली र पर्सी पनि देशको धेरैजसो ठाउँको मौसम बद्ली भई पानी पर्ने सम्भावना रहेको जल तथा मौसम पूर्वानुमान महाशाखाले जनाएको छ । यो वर्ष पश्चिमी वायु लगातार रुपमा नेपाल भित्रिइरहेको कारणले यसैको प्रभावले केही दिनमा नै मौसम बदलिरहेको छ ।

लगातार रुपमा भित्रिरहेको पश्चिमी वायुका कारण धेरै लामो समयसम्म घाम लाग्न सकेको छैन । यो वर्ष गएको पुस २३ गते काठमाण्डौ उपत्यकामा पहिलोपटक हिउँदे वर्षा भएको थियो । त्यसपछि भने लगातार रुपमा पश्चिमी वायु भित्रिरहेको छ ।