अखबार नेपाल ट्रेन्डिङ

काठमाडौं: पूर्वउपप्रधान तथा अर्थमन्त्री भरतमोहन अधिकारीको उपचारका क्रममा हिजो निधन भएको छ । लामो समयदेखि अस्वस्थ नेता अधिकारीको ८२ वर्षको उमेरमा हिजो राति ह्याम्स अस्पतालमा निधन भएको हो ।

नेता अधिकारीलाई हेर्न पुगेका मोरङ समाज काठमाडौँका अध्यक्ष कृष्णमुरारी कोइरालाका अनुसार भेन्टिलेटरमा नेता अधिकारीको श्वासप्रश्वास कम हुँदै गएको थियो । त्यसपछि अधिकारीको निधन भएको जानकारी चिकित्सकहरुले आफन्तलाई दिएका हुन् ।

फोक्सो र मुटुमा समस्या हुँदा तीन सातादेखि ह्याम्स अस्पतालमा उपचाररत अधिकारीलाई बचाउन नसकिएको ह्याम्स अस्पतालको क्रिटिकल केयर सर्विसेजका संयोजक डा. हेमराज पनेरुले जानकारी दिनुभएको थियो । हिजो दिउँसो मात्रै डा. पनेरु र अस्पतालका मेडिकल डिरेक्टर डा. भास्करराज पन्तले विज्ञप्ति सार्वजनिक गर्दै बचाउनसक्ने सम्भावना न्यून रहेको बताउनुभएको थियो ।

विदेशमा रहेकी छोरी आइनपुग्दासम्म अस्पतालमा अधिकारीलाई कृत्रिम स्वासप्रस्वासका लागि भेन्टिलेटरमा राखिएको थियो । अधिकारीको वि.सं. १९९३ साल वैशाख २२ गते महोत्तरीको भ्रमरपुरामा बुवा रामचन्द्र र आमा पूर्णकुमारीको कोखबाट जन्म भएको थियो । अधिकारीका श्रीमती ओमकुमारी र तीन छोरी हुनुहुन्छ ।

दिवंगत अधिकारीको पार्थिव शरीर अन्तिम श्रद्धाञ्जलीका लागि आज बिहान ९ बजेदेखि मध्यान्ह १२ बजेसम्म पार्टी कार्यालय धुम्बाराहीमा राखिने नेकपाका नेता कृष्णगोपाल श्रेष्ठले जानकारी दिनुभयो ।।