अखबार नेपाल ट्रेन्डिङ

काठमाडौं : प्रतिनिधिसभा सदस्य निर्वाचनमा मतदान गर्नका लागि काठमाडौंबाट आफ्नो गृहजिल्ला फर्किने क्रमसँगै उपत्यकाका सडक सुनसान जस्तै भएको छ । रोजगारी, अध्ययन र अन्य विभिन्न सिलसिलामा काठमाडौं उपत्यकामा बसोवास गर्दै आएका मतदाताहरू आफ्नो मताधिकार प्रयोग गर्न गाउँ फर्किन थालेका हुन् ।

यातायात व्यवसायीहरूका अनुसार पछिल्लो केही दिनयता उपत्यका बाहिरिने यात्रुको संख्यामा उल्लेख्य वृद्धि भएको जनाएको छ । यात्रुको चापलाई मध्यनजर गर्दै यातायात व्यवसायी समितिहरूले थप बसहरूको व्यवस्थापन गर्ने प्रयास गरिरहेको बताएका छन् । यद्यपि, मागको तुलनामा सवारी साधन अपुग हुँदा कतिपय यात्रुहरूले महँगो भाडा तिरेर वा जोखिमपूर्ण यात्रा गर्न बाध्य भएको अवस्था पनि छ ।

ट्राफिक प्रहरीले पनि उपत्यका बाहिरिने नाकाहरूमा सुरक्षा जाँच कडा पारेको छ भने यात्रुहरूको सहजताका लागि विभिन्न स्थानमा नागरिक सहायता कक्षहरू स्थापना गरेको छ । क्षमताभन्दा बढी यात्रु बोक्ने र तोकिएभन्दा बढी भाडा असुल्ने सवारी साधनलाई कारबाही गरिने काठमाडौं उपत्यका ट्राफिक प्रहरी कार्यालयले चेतावनी दिएको छ ।

निर्वाचन आयोगले सबै मतदातालाई निर्धक्क भएर आफ्नो मताधिकार प्रयोग गर्न आह्वान गरिरहेको बेला नागरिकहरूमा उत्साह देखिएको छ । गाउँगाउँमा चुनावी चहलपहल बढेसँगै उम्मेदवारहरू पनि मतदाता फकाउन अन्तिम कसरतमा जुटेका छन् । निर्वाचन सुरक्षालाई मध्यनजर गर्दै सरकारले बुधबार राति १२ बजेबाट अत्यावश्यक बाहेकका सवारीसाधन सञ्चालन गर्न रोक लगाएको छ ।