अखबार नेपाल ट्रेन्डिङ

काठमाडौं: भनिन्छ, कतिपय दशक केही नभई बित्छन् अनि कतिपय सातामै दशकौँका घटना भइदिन्छन् । २०८२ भाद्र २३ र २४ गते जेनजीले गरेको आन्दोलनमा देशले ठूलो धनजनको क्षति भयो । दुई दिनमै कैयन दशकमा नहुने घटना भए । जेनजी पुस्ताले सडकमा ओर्लिएर कुशासन र बेथितिविरूद्ध, अनि सुशासन र कानुनी शासनको पक्षमा स्पष्ट माग राखेर जुन जबर्जस्त हस्तक्षेप ग‍र्यो, त्यो नेपालको राजनीतिक इतिहासमा स्वर्ण अक्षरले अंकित रहनेछ ।

सयौं वर्षदेखिका ऐतिहासिक दस्तावेज, कागजात, रेकर्डहरू खरानी भए । त्यसै दिन निहत्था विद्यार्थी र युवाहरूमाथि राज्यले जुन बर्बर दमन ग‍र्यो, त्यो लोकतान्त्रिक शासन व्यवस्थामा एउटा ठूलो कलंकका रूपमा दर्ज हुनेछ । र, जेनजी पुस्ताको गौरवपूर्ण आन्दोलनको आडमा भदौ २४ गते ज-जसले राज्यका सम्पत्ति, प्रमुख शासन केन्द्र सिंहदरबार, संसद भवन, सर्वोच्च अदालतसहित देशभरका कार्यालयमा आक्रमण गरे निजी व्यवसायमाथि धावा बोले, राजनीतिज्ञ, व्यवसायी र कैयन व्यक्तिका घरमा गएर हमला गरे त्यसले नेपाली राज्य र समाजको तन्तु हल्लाइदिएको छ ।

समय क्रममा यी सबै घटनाको निष्पक्ष छानबिन हुने नै छ । अहिले भने हामी सबैले भोलिको नेपाललाई आशाका साथ हेर्ने र त्यसका लागि इँटाहरू राख्न सुरू गर्ने समय हो । आउने केही दिनमा हामीले गर्ने निर्णयले अब आउने वर्षहरू होइन, दशकहरू प्रभावित हुनेछन् । त्यसैले ठण्डा दिमागले थोरै समय लिएर सोच्ने र निर्णय गर्ने बेला आएको छ ।

तस्बीरमा ध्वस्त संरचनाः (तस्बीरहरु शंकर भुजेल)