अखबार नेपाल ट्रेन्डिङ

काठमाडौं: नेकपा एमालेको केन्द्रीय कमिटी बैठक पार्टी केन्द्रीय कार्यालय च्यासलममा सुरू भएको छ । बैठकमा दोस्रो विधान महाधिवेशनमा प्रस्तुत हुने राजनीतिक प्रतिवेदनको अवधारणासहित पार्टी अध्यक्ष केपी शर्मा ओलीले समसामयिक विषयमा सम्बोधन गर्नेछन् ।

साथै भदौ २० देखि २२ गतेसम्म हुने दोस्रो विधान महाधिवेशनको तयारीमा केन्द्रित छलफल, पोलिटब्युरो बैठकले अनुमोदन गरेको विधान संशोधन प्रस्तावलाई उपाध्यक्ष विष्णुप्रसाद पौडेलले केन्द्रीय कमिटीको बैठकमा प्रस्तुत गर्नेछन् । त्यस्तै विधान महाधिवेशनमा प्रस्तुत गरिने संगठनात्मक प्रस्तावको सन्दर्भमा महासचिव शंकर पोखरेलले वडा केन्द्रित अभियान, सदस्यता नविकरण, प्रतिगमनकारी क्रियाकलाप विरुद्धको जागरण अभियान र स्थानीय कमिटीहरूको अधिवेशन लगायतका बारेमा बैठकलाई जानकारी गराउने कार्यसूचि रहेको छ । केन्द्रीय कार्यालयको जिम्मा रहेको विधान महाधिवेशनको तयारी र अन्य व्यवस्थापन सम्बन्धी जानकारी केन्द्रीय कमिटीको बैठकमा प्रस्तुत हुने बताइएको छ ।

पूर्वराष्ट्रपति विद्यादेवी भण्डारीलाई पार्टीमा सक्रिय राजनीतिमा फर्काउने वा नफर्काउने भन्ने निर्णय पनि केन्द्रीय कमिटीले गर्ने बताइएको छ । बैठक सोमबार र मंगलबार गरी दुई दिन चल्नेछ । बैठकस्थलमा सञ्चारकर्मीलाई प्रवेशमा रोक लगाईएको छ । बैठक हलबाहिरसमेत फोटो पत्रकारलाई जान नदिई सडककै पर्खालमा पर्चा टाँसेर स्थान तोकिएको छ । सुरक्षाका कारण भन्दै केन्द्रीय सदस्यबाहेक अरु सबैलाई सडकमै रोकिएको हो । फोटो पत्रकार तथा अन्य सञ्चारकर्मी सडकमै धुलो खाँदै समाचार संकलन गरिरहेका छन् । अरु बेला बैठक हल बाहिरसम्म जान दिने गरिएको थियो ।