अखबार नेपाल ट्रेन्डिङ

काठमाडौं: सवारी नियम उल्लंघन गर्नेहरूलाई अनलाइन माध्यमबाट कक्षा लिन उपत्यका ट्राफिक प्रहरी कार्यालयले प्रहरी प्रधान कार्यालयमा प्रस्ताव पठाएको छ । लेन अनुशासन पालना नगरेको, तीव्र गतिमा सवारी दौडाएको, मादक पदार्थ सेवन गरेर सवारी चलाएको र रातो बत्तीमा सवारी चलाउनेलाई अनलाइन प्रविधिबाट कक्षा लिन प्रस्ताव गरिएको हो ।

प्रहरी प्रधान कार्यालयको सूचना प्रविधि निर्देशनालयले अनलाइन कक्षा लिँदा चालकलाई जिम्मेवार बनाउने गरी सफ्टवेयर तयार गरिरहेको छ । ट्राफिक नियम उल्लंघनकर्ता नै अनलाइन कक्षामा सहभागी भए नभएको र पुरा समय कक्षा लिएको वा नलिएको थाहा हुनेगरी सफ्टवेयर तयार भइरहेको प्रहरी प्रधान कार्यालयले जनाएको छ ।

सडकमा लाइसेन्स चेकजाँच गर्दा नागरिक एपबाट हेर्न मिल्ने प्रणाली लागु गरिएको छ । सचेतना कक्षा लिँदा पनि नागरिक एप र नेपाल प्रहरी एपलाई लिङ्कअप गर्नेगरी काम भइरहेको अधिकारीहरू बताउँछन् । प्रहरी स्रोतका अनुसार ज्ञान बजार प्रालिको सहकार्यमा सफ्टवेयर बनिरहेको छ । एआई डिटेक्सन प्रविधिले ६० सेकेन्डभन्दा बडी समय अनलाइनमा चालक बसे नबसेको र सम्बन्धित बाहेक अर्को मानिस बसेको पनि पहिचान गर्नेछ ।